Գումարուել է Ատրպատականի հայոց թեմի Պատգամաւորական ժողովի
3-րդ նիստը
28-01-2010 14:30:00 | | Հասարակութիւն
ԹԱՎՐԻԶ, 28 ՅՈՒՆՎԱՐԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Ատրպատականի
հայոց թեմի կենտրոն Թավրիզի ազգային առաջնորդարանի «Էմիլ Յակոբեան»
դահլիճում գումարուել է Պատգամաւորական ժողովի Բ նիստը` թեմակալ
առաջնորդ Նշան եպիսկոպոս Թոփուզյանի նախագահութեամբ: Ինչպէս
տեղեկացնում է «Ալիքը», ժողովին մասնակցել են Թավրիզի, Ուրմիո եւ
Սալմաստի պատգամաւորները, թեմական խորհուրդը եւ հաշուեքննիչ
մարմինը: Ժողովի ատենապետներն են եղել Մկրտիչ Թումանյանը եւ Փայլակ
Սահակեանը:
Տերունական աղօթքից յետոյ Նշան Սրբազանը ժողովականներին
փոխանցել է Մեծի Տանն Կիլիկիոյ Արամ Ա կաթողիկոսի հայրապետական
ողջոյնները: Ապա իր գոհունակութիւնն է յայտնել թեմի նորընտիր
Թեմական խորհրդի եռամսյա գործունէութեան վերաբերեալ, ինչպէս նաեւ`
Ուրմիո նորընտիր Գործակալական խորհրդի եւ Սալմաստի պատգամաւորի
ազգանուէր աշխատանքի կապակցութեամբ: Այնուհետեւ դիւանը գործադրել է
առաջարկուած եւ նախատեսուած օրակարգերը, եւ Ա ատենադպիր Անի
Մելիքյանն ընթերցել է նախկին նիստի արձանագրութիւնը եւ
վաւերացրել: Օրակարգում քննարկուել են թեմի տարածքների հարցը,
մանաւանդ հայաթափ շրջանների պարագայում, շինարարական աշխատանքներ
իրագործելու կարեւորութիւնը եւ թեմի տնտեսական վիճակը բարելաւելու
անհրաժեշտութիւնը:
Ժողովին առաջարկուել է թեմակալ առաջնորդ Սրբազան հոր եւ դիւանի
կողմից խնդրագիր ներկայացնել Արամ Ա կաթողիկոսին` հայրապետական
օրհնություն եւ հաստատում ստանալու համար: Քննարկուել է նաեւ Արամ Ա
կաթողիկոսի պաշտօնական հրավէր-նամակը` Թեմական խորհրդի եւ
Պատգամաւորական ժողովի դիւանի` առաջիկայում Անթիլիաս այցելելու եւ
Վեհափառ Հայրապետի, ինչպէս նաեւ Մեծի Տանն Կիլիկիոյ կաթողիկոսութեան
Ազգային կենտրոնական վարչութեան հետ աշխատանքային հանդիպումներ
ունենալու: Օրակարգում լսուել է նաեւ Ուրմիո հոգեւոր հովիւ կամ
ծխատեր քահանա ունենալու հարցը: Ժողովի աւարտին Սալմաստի
պատգամաւորը մտահոգութիվւն է յայտնել որոշ տարածքների, մշակոյթային
կոթողների եւ լքվածության երեւույթների առթիւ: