ԳԱԶԱԼՑՄԱՆ ԸՆԿԵՐՈՒԹԻՒՆՆԵՐԸ ՆԱԽԱԶԳՈՒՇԱՑՈՒԵԼ ԵՆ ՁԵՌՆՊԱՀ ՄՆԱԼ
ԾԱՌԱՅՈՒԹԻՒՆՆԵՐԻ ԳՆԵՐԻ ՉՀԻՄՆԱՒՈՐՈՒԱԾ ԲԱՐՁՐԱՑՈՒՄԻՑ
30-07-2008 20:40:00 | Հայաստան | Տնտեսութիւն
ԵՐԵՎԱՆ, 30 ՅՈՒԼԻՍԻ, ՆՈՅԵԱՆ ՏԱՊԱՆ: ՀՀ Տնտեսական մրցակցութեան
պաշտպանութեան պետական յանձնաժողովի յուլիսի 30-ի նիստում
քննարկվեցին ՀՀ կառավարութեան որոշմամբ մայիսին գազի սուբսիդիայի
վերացումից յետոյ աւտոգազալցման շուկայում արձանագրուած գների
բարձրացման առթիւ յարուցուած վարոյթի արդիւնքները:
Նշենք, որ Հայաստանում գործող գազալցակայանների գերակշիռ
մեծամասնութիւնը մայիսի առաջին չորս օրերին միաժամանակ
բարձրացրեցին գազալիցքաւորման գները` 130 դրամից դարձնելով 200
դրամ` 1 խմ-ի համար:
Ինչպէս նշեց յանձնաժողովի նախագահ Աշոտ Շահնազարեանը, գործող
գազալցման ընկերութիւնների մեծամասնութեան վարքագիծը` միաժամանակ
եւ միեւնոյն չափով տնտեսական գործօններով չպայմանավորված գների
բարձրացումը եւ այնուհետեւ իջեցումը, վկայում են հնարաւոր
հակամրցակցային համաձայնութեան մասին: Հաշուի առնելով, որ վարոյթ
յարուցելու վերաբերեալ Յանձնաժողովի որոշման ընդունումից յետոյ 214
ընկերութիւններ իջեցրել են իրենց կողմից իրականացyող
գազալիցքաւորման ծառայութիւնների գները, Յանձնաժողովը
նախազգուշացրեց աւտոգազալցման գործունէութիւն իրականացնող
տնտեսվարողներին` յետագայում ձեռնպահ մնալ գների չհիմնաւորուած
բարձրացումից:
Ըստ Ա.Շահնազարեանի, տնտեսական վերլուծութիւնները ցոյց են
տալիս, որ իջեցուած գները` 115-160 դրամի սահմաններում, նույնպես
հիմնաւորուած չեն: Նրա խօսքերով, առաջիկայում կուսումնասիրուի այդ
տնտեսվարողների կողմից կիրառուող գների հիմնաւորուածութիւնը եւ
հնարաւոր է, որ որոշ տնտեսվարող սուբյեկտների մօտ նորից գնանկում
լինի:
Նշուեց նաեւ, որ յանձնաժողովը ուսումնասիրութեան արդիւնքները
կտրամադրի ՀՀ Հարկային պետական ծառայութեանը` առաջարկելով քննարկել
գազալիցքաւորման ծառայութիւնների համար հաստատագրուած վճարի
կիրառումը վերանայելու հարցը: