Մարմարա Ինչպէս ծանօթ է, Եւրոպայի 2012ի ֆութպոլի բաժակի զտումի մրցաշարքէն ներս Հայաստանի ազգային խումբը 7 նիշով երկրորդ-երրորդ տեղերը կը բաժնէ իր ենթախումբին մէջ, ուր առաջատարն է Ռուսաստան՝ 9 նիշով։ Հայաստանի ազգային խումբի երիտասարդ մարզիկները, որոնք այս տարի շատ լաւ խաղարկութիւն ցոյց կուտան ու իրենց յաղթանակներով կրկին ժողովուրդի մօտ արթնցուցած են ֆութպոլային խաղերու նկատմամբ սէրը, վաղը պիտի մրցին առաջատար Ռուսաստանի ընտրանիի հետ։ Վերջին տարիներու ընթացքին առաջին անգամ ըլլալով ֆութպոլային մրցումի մը տոմսակները սեւ շուկայ ինկան։ Հայաստանեան լրատու գործակալութիւններ կը հաղորդեն թէ այդ մրցումի տոմսերը սպառած էին 15 Մարտին, սակայն տոմսերու մէկ մասը արդէն սեւ շուկայի մէջ է եւ »Հանրապետական« մարզադաշտի մերձակայքը կը շրջին անձեր, որոնք պատրաստ են տոմսեր տրամադրելու վաղուայ մրցումի համար։ Բնականաբար տոմսերը անվճար չեն։ Դեռ աւելի՛ն, մարզադաշտի հիւսիսային ու հարաւային »թրիպիւն«ներու տոմսերը »սեւ շուկայ«ի մէջ կ’արժեն 25-45 հազար դրամ։ Տոմսարկղներու մէջ անոնք կ’արժէին ընդամէնը 3000 դրամ։ Իսկ արեւելեան »թրիպիւն«ի տոմսերը երէկ մարզադաշտի մօտ կը վաճառուէին 45-50 հազար դրամով։ Յիշեցնենք որ մարզադաշտն ունի 15 հազար նստատեղի։

---