ՀՀ-ՈՒՄ ԱՌԵՎՏՐԱՅԻՆ ԻՐԱՒԱԲԱՆԱԿԱՆ ԱՆՁԱՆՑ ԹԻՒԸ ՄԷԿ ՏԱՐՈՒՄ ԱՃԵԼ
Է 5%-ՈՎ, ԻՍԿ ԱՆՀԱՏ ՁԵՌՆԱՐԿԱՏԷՐԵՐԻՆԸ` 30,26%-ՈՎ
20-08-2008 16:50:00 | Հայաստան | Տնտեսութիւն
ԵՐԵՎԱՆ, 20 ՕԳՈՍՏՈՍԻ, ՆՈՅԵԱՆ ՏԱՊԱՆ: ՀՀ Արդարադատութեան
նախարարութեան Իրաւաբանական անձանց եւ անհատ ձեռնարկատէրերի
պետական ռեգիստրի գործակալութեան տուեալներով, 2008թ.-ի
յունուար-յունիսին գրանցուել են 1848 առեւտրային իրաւաբանական անձինք
եւ 7105 անհատ ձեռնարկատէրեր, որոնց ընդհանուր թիւը յուլիսի 1-ի
դրութեամբ կազմել է, համապատասխանաբար, 57903 եւ 57184: ՀՀ Ազգային
վիճակագրական ծառայութեան տուեալներով, 2007թ.-ի յուլիսի 1-ի
դրութեամբ գրանցուած են եղել 55146 իրաւաբանական անձինք եւ 43899
անհատ ձեռնարկատէրեր: Մէկ տարուայ ընթացքում իրաւաբանական անձանց
թիւն աճել է 5%-ով, իսկ անհատ ձեռնարկատէրերինը` 30,26%-ով:
2008թ.-ի առաջին կիսամեակում լուծարուել են 487 իրաւաբանական
անձինք եւ 803 անհատ ձեռնարկատէրեր:
Նոյն ժամանակահատուածում գրանցուած 1848 իրաւաբանական անձինք
կատարել են 12 մլրդ 742,05 մլն դրամի (մօտ 41 մլն 426,8 հազ. ԱՄՆ
դոլար) ներդրումներ: Օտարերկրեայ ներդրումներով հիմնուած 178
ձեռնարկութիւններում կատարուել են 7 մլրդ 9,36 մլն դրամի
ներդրումներ, որոնցից միայն օտարերկրեայ իրաւաբանական անձանց եւ
քաղաքացիների կողմից հիմնադրուած 102 ձեռնարկութիւններում` 6 մլրդ
945,64 մլն դրամի, իսկ 76 համատեղ ձեռնարկութիւններում` 63,72 մլն
դրամի ներդրումներ: