ՏԻՄՈՇԵՆԿՈՆ ՀԱՄԱՁԱՅՆԵԼ Է ԿՈԱԼԻՑԻԱՅԻ ՁԵՒԱՒՈՐՄԱՆ ՅՈՒՇՉԵՆԿՈՅԻ
ՊԱՀԱՆՋԻՆ
12-10-2007 20:25:00 | | Միջազգային
ԿԻԵՎ, 12 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Իր անունով կոչւող
դաշինքի ղեկավար Իւլեա Տիմոշենկոն համաձայնել է խորհրդարանական
կոաիցիայի եւ կոալիցիոն կառավարութեան ձեւաւորման վերաբերեալ
Ուկրաինայի նախագահ Վիկտոր Յուշչենկոյի բոլոր պահանջներին: Այս
մասին նա յայտնել է մամլոյ ասուլիսում:
«Մենք ընդունել ենք նախագահի այն պայմանը, որ ներքին գործերի
նախարարի թեկնածութիւնը, որ ըստ Սահմանադրութեան կոալիցիան է
առաջարկում, առաջարկելու է նախագահը»,- ասել է Տիմոշենկոն: Ըստ
նրա, նախագահի երկրորդ պայմանը նախարարների կաբինետի մասին օրէնքի
նոր խմբագրութեան ընդունումն էր: «Մեր երկու թիմերը (ՅՈՒՏԴ-ն եւ
«Մեր Ուկրաինա-Ժողովրդական ինքնապաշտպանութիւն») ամբողջովին
համաձայնեցրել են օրինագիծը: Չի մնացել ոչ մի տարաձայնութիւն, եւ
մենք պատրաստ ենք այն քննարկել առաջնահերթ, մինչեւ կառավարութեան
ձեւաւորումը»,- յայտարարել է Տիմոշենկոն:
Նախագահի երրորդ պահանջը եղել է 2008 թուականի ընթացքում
հանրաքուէի դնել Սահմանադրութեան նոր խմբագրութիւնը: «Մենք
համաձայնեցրել ենք նաեւ նոր Սահմանադրութեանն առնչուող
ընթացակարգային հարցերը,- ասել է Տիմոշենկոն:- Դա համընկնում է մեր
թիմի պահանջներին` հանրաքուէով որոշել կառավարման ձեւը, այնուհետեւ
ընդունել նոր խմբագրութիւնը»:
ԴԱՍ. ՀԱՅԵՐԵՆ 
Հայերեն
Русский
English
French