ՀԱՅԱՍՏԱՆԻ ՖՈՆԴԱՅԻՆ ԲՈՐՍԱՅԻ ԵՎ ԴԵՊՈԶԻՏԱՐԻԱՅԻ ՎԱՃԱՌՔԻ
ՊԱՅՄԱՆԱԳԻՐԸ ԿՍՏՈՐԱԳՐՈՒԻ ՀՈԿՏԵՄԲԵՐԻ ՎԵՐՋԻՆ ԿԱՄ ՆՈՅԵՄԲԵՐԻ ՍԿԶԲԻՆ
10-10-2007 21:30:00 | Հայաստան | Տնտեսութիւն
ԵՐԵՎԱՆ, 10 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: «Արժեթղթերի շուկայի
մասին» օրէնքի փոփոխութիւնը ՀՀ կառավարութեանը կընձեռի
շվեդա-ֆիննական OMX AB ընկերութեան հետ Հայաստանի ֆոնդային բորսայի
եւ դեպոզիտարիայի վաճառքի պայմանագրի ստորագրման օրենսդրական
հնարաւորութիւն: Հոկտեմբերի 10-ին Ազգային Ժողովում նշուած
օրէնքում փոփոխութիւն կատարելու օրինագծի եւ դրա հետ կապուած
օրենսդրական փաթեթի քննարկման աւարտին այս մասին լրագրողներին
յայտարարեց ՀՀ Կենտրոնական բանկի նախագահ Տիգրան Սարգսեանը: Նա
յայտնեց, որ պայմանագիրը կստորագրուի հոկտեմբերի վերջին կամ
նոյեմբերի սկզբին` օրէնքի ուժի մէջ մտնելուց անմիջապէս յետոյ:
«Այսուհետեւ բորսայական բիզնեսի կառավարումը Հայաստանում
կիրականացուի շուկայական կանոններով: Դա նշանակում է, որ մենք
ճանապարհ ենք բացում օտարերկրեայ ներդրողների համար, որպէսզի նրանք
կարողանան ներդրումներ կատարել եւ զարգացնել բորսան եւ
դեպոզիտարիան մեր հանրապետութությունում»,- ասաց ԿԲ-ի նախագահը:
Տ.Սարգսեանը միաժամանակ նշեց, որ կան բազմաթիւ նորմեր, որոնք
դեռեւս ներառուած չեն օրէնքում, բայց միջազգային պրակտիկայում
կիրառւում են: Նրա խօսքերով, փուլ առ փուլ բարեփոխվելու է
«Արժեթղթերի շուկայի մասին» օրէնքը. յաջորդ տարի ներկայացուելու է
նոր օրենսդրական փաթեթ, շուկայի զարգացմանը զուգնթաց փորձ է
արուելու նոր մեխանիզմներ եւ սկզբունքներ կիրառել:
Նոյն օրը ԱԺ-ն երկրորդ եւ երրորդ ընթերքմամբ քննարկեց նշուած
օրենսդրական փաթեթը, որի ընդունումը կքուէարկուի մօտ ժամնակներս: