ՉՈՐՐՈՐԴ ՀԱՄԱՀԱՅԿԱԿԱՆ ԽԱՂԵՐԻ ԱՆՑԿԱՑՈՒՄԸ ՀԱՅԱՍՏԱՆ-ՍՓԻՌՔ
ԿԱՊԵՐԻ ԱՄՐԱՊՆԴՄԱՆ ՀԱՐՑՈՒՄ ԱՄԵՆԱՄԵԾ ԳՈՐԾՆԱԿԱՆ ՔԱՅԼՆ ԷՐ,- ԱՍՈՒՄ Է
ՌՈԼԱՆԴ ՇԱՌՈԵԱՆԸ
28-08-2007 21:40:00 | Հայաստան | Սպորտ
ԵՐԵՎԱՆ, 28 ՕԳՈՍՏՈՍԻ, ՆՈՅԵԱՆ ՏԱՊԱՆ: Չորրորդ համահայկական
խաղերի անցկացումը ամենամեծ գործնական քայլն էր Հայաստան-Սփիռք
կապերի ամրապնդման հարցում: Օգոստոսի 28-ի ասուլիսում նման տեսակէտ
յայտնեց Համահայկական խաղերի համաշխարհային կոմիտէի փոխնախագահ
Ռոլանդ Շառոեանը: Նրա խօսքերով, ի թիւս բազմաթիւ դրական
փոփոխութիւնների, այս տարի արձանագրուեցին նաեւ մի շարք
բացթողումներ, մասնաւորապէս խաղադաշտերի, դահլիճների ոչ պատշաճ
վիճակը, որոնց բարեկարգման համար, ըստ Ռ.Շառոեանի, չբավականացրին
խաղերի անցկացման համար յատկացուած ֆինանսական միջոցները: Նշենք, որ
չորրորդ համահայկական խաղերի ընդհանուր բիւջէն կազմում էր մօտ 80
մլն դրամ (մօտ 235 հազար ԱՄՆ դոլար):
Ռ.Շառոեանը միաժամանակ օրինաչափ համարեց այն փաստը, որ
խաղարկվող մեդալների զգալի մասը բաժին հասաւ հայաստանցի
մարզիկներին: «Հայաստանում կան մարզական հզօր բազաներ, եւ մեր
մարզիկները միշտ լաւ մարզավիճակում են»,- ասաց նա` նշելով, որ
սփիւռքի մեր հայրենակիցները միայն վերջին 2 ամիսներին են
ինտենսիվորեն նախապատրաստուել մրցումներին:
Անրադառնալով Երեւանի եւ Կահիրէի բասկետբոլի թիմերի հանդիպման
ժամանակ տեղի ունեցած լուրջ միջադէպին, կազմկոմիտէի ներկայացուցիչը
յայտարարեց, որ Երեւանի թիմը զրկուել է յաջորդ համահայկական խաղերին
մասնակցութեան իրաւունքից: Ըստ Ռ.Շառոեանի, նախատեսւում է, որ
նոյնպիսի որոշում կկայացուի նաեւ Ստեփանակերտի ֆուտբոլի թիմի
վերաբերեալ: