ԼՈՆԴՈՆ, 11 ՅՈՒԼԻՍԻ, ՆՈՅԵԱՆ ՏԱՊԱՆ: «Ալ Ղաիդա» ահաբեկչական
կազմակերպութիւնը սպառնում է Մեծ Բրիտանիայում իրականացնել նոր
ահաբեկչական գործողութիւններ` Եղիսաբեթ II թագուհու կողմից հնդիկ
գրող Սալման Ռուշդիին ասպետի տիտղոս շնորհելու պատճառով:
Իսլամիստական կայքէջերից մէկում տեղադրուած աուդիոուղերձով
բրիտանական իշխանութիւններին է դիմել «Ալ Ղաիդա» կազմակերպութեան
առաջնորդներից Այման Զավահիրին: Իր ուղերձում ահաբեկիչը նոր
վարչապետ Գորդոն Բրաունից պահանջել է փոխել պետութեան այն
քաղաքականութիւնը, որը դարձաւ «Լոնդոնի կենտրոնում տեղի ունեցած
ողբերգական դէպքերի պատճառ». «Եթէ դուք չեք հասկացել, ապա մենք
պատրաստ ենք այն կրկնել»,- յայտարարել է ահաբեկիչը:
Նշենք, որ բրիտանական հպատակութիւն ունեցող Սալման Ռուշդին
իր «Սատանայական ստեղծագործութիւններ» վէպի պատճառով 1989թ. Իրանի
Իսլամական Հանրապետութեան հիմնադիր Այաթոլլա Հոմեյնիի կողմից
դատապարտուել էր մահապատժի: Վերջերս իրանական իշխանութիւնները
յայտարարել էին, թէ այդ որոշումը մնում է անփոփոխ: Իսկ 2007թ.
յունիսի 16-ին Բրիտանիայի կողմից գրողին ասպետի տիտղոս շնորհելը
առաջ բերեց մուսուլմանական աշխարհի բուռն հակազդեցութիւնը: