ԵՐԵՎԱՆ, 20 ՅՈՒՆԻՍԻ, ՆՈՅԵԱՆ ՏԱՊԱՆ: «Արմէնիան Թեքնոլըջի
գրուպ» (ATG) հիմնադրամը ամերիկահայ բարերար Վաչէ Սողոմոնյանի
ֆինանսական աջակցութեամբ յունիսի 21-27-ին կանցկացնի
«Երեւան-Ստեփանակերտ-Երեւան» ամենամեայ հեծանվային արշաւը: Ինչպէս
«ՆՈՅԵԱՆ ՏԱՊԱՆ»-ի թղթակցին յայտնեց հիմնադրամի փոխտնօրեն Կարեն
Յակոբեանը, այս տարի արշաւին մասնակցելու են 20 հեծանւորդներ,
որոնցից 9-ը` ԱՄՆ-ից, որոնք անցնելու են մօտ 1200-1300 կմ: Ինչպէս
նախորդ տարիներին, այս տարի նույնպես կնկարահանուի այդ ակցիայի
մասին ֆիլմ, որը կցուցադրուի ԱՄՆ-ում:
Ըստ Կ.Յակոբեանի, հինգերորդ անգամ անցկացուող հեծանվային
արշաւը բարեգործական նպատակ ունի. միջոցառման արդիւնքում
հանգանակուած գումարներով իրականացւում են Հայաստանի եւ ԼՂՀ-ի
գիւղատնտեսութեան զարգացմանն ուղղուած ծրագրեր:
ՀՀ Հեծանվասպորտի ասոցիացիայի նախագահ Մարտին Շարբատյանի
խօսքերով, այսօր Հայաստանում այս սպորտաձեւը անտարբերութեան է
մատնուած: Ըստ նրա, դրա արդիւնքում բոլորովին անմխիթար վիճակում է
յայտնուել Երեւանի հեծանվահրապարակը, որը չունի նորմալ
հանդերձարաններ, լոգասենյակներ, ինչպէս նաեւ հեծանիվներ:
Կ.Հակոբեանն էլ նշեց, որ պատահական չէ, որ արշաւը աւարտուելու
է Երեւանի հեծանվահրապարակում: «Ցանկանում ենք բարեգործների
ուշադրութիւնը հրաւիրել հեծանուահրապարակի, յատկապէս հեծանվուղու
վերանորոգման խնդրի վրայ»,- ասաց նա: