ԹԱՏԵՐԱԿԱՆ ԳՈՐԾԻՉՆԵՐԸ ԵՐԿՈՒ ՕՐ ՔՆՆԱՐԿԵՑԻՆ ՈԼՈՐՏՈՒՄ ԱՌԿԱՅ
ԽՆԴԻՐՆԵՐԸ
07-05-2007 20:00:00 | Հայաստան | Մշակոյթ
ԾԱՂԿԱՁՈՐ, 7 ՄԱՅԻՍԻ, ՆՈՅԵԱՆ ՏԱՊԱՆ: Թատրոնների
գործունէութեանն ու թատերական խնդիրներին էին նուիրուած Ծաղկաձորում
մայիսի 5-6-ը կայացած համաժողովը, որին մասնակցում էին Հայաստանի
պետական եւ ոչ պետական գրեթէ բոլոր թատրոնների ղեկավարներն ու
ներկայացուցիչները:
ՀՀ նախագահին կից մշակոյթի խորհրդի համակարգող, նախագահի
խորհրդական Սեյրան Աւագեանի նախաձեռնեությամբ արդէն չորրորդ անգամ
կազմակերպւող համաժողովը(մինչեւ այդ նմանատիպ համաժողովներ են
կազմակերպուել կերպարուեստի, կինոյի եւ գրականութեան ոլորտի
ներկայացուցիչների մասնակցութեամբ) միտուած է մշակոյթի ոլորտի արդի
խնդիրները վեր հանելուն, առաջարկութիւններն արձանագրելուն, հրատապ
հարցերը քննարկելուն եւ դրանց լուծման ու յետագայ առաջընթացի համար
ռազմավարութիւն մշակելուն:
ՀՀ մշակոյթի եւ երիտասարդության հարցերի նախարար Յասմիկ
Պողոսեանը մասնաւորապէս խօսեց այն մասին, որ երեք` Սունդուկեանի,
Պարոնեանի եւ Ստանիսլավսկու անուան թատրոնների շէնքերի պահպանումը
պէտք է պետութիւնը ամբողջապէս վերցնի իր վրայ, որպէսզի մասնաւոր
թատրոնները կարողանան ներկայացումներ բեմադրել եւ ցուցադրել
դրանցում:
Երիտասարդ ռեժիսորները թատերական բազմերանգությունը
պահպանելու նպատակով բարձրացրեցին «ազատ բեմ» ունենալու խնդիրը`
առաջարկելով կառուցել նոր շէնք կամ ունեցածներից մէկը օգտագործել
այդ նպատակով: Ներկաները անդրադարձան նաեւ թատերական
դրամատուրգիային, թատրոնների կառավարման նոր ձեւին, ըստ որի,
թատրոնում պէտք է տարանջատուեն գեղարուեստական ղեկավար եւ ռեժիսոր
պաշտօնները: Ներկաները նաեւ առաջարկեցին նուազեցնել թատրոնների
տոմսերի արժէքից գանձուող աւելացուած արժէքի հարկի դրույքաչափը: Բացի
այդ, քննարկվեց նաեւ հեռուստաթատրոնի աւանդոյթի վերկանգնման
հարցը:
Աւարտելով համաժողովը, Սեյրան Աւագեանը նշեց, որ ինքը այս
քննարկման նիւթը ամբողջապէս փոխանցելու է երկրի նախագահին: Ըստ
նախագահի խորհրդարկանի, քաղաքակիրթ ու զարգացած երկրներում բոլոր
հարցերը լուծւում են այս ձեւաչափով. լսում են ոլորտի մասնագէտների
կողմից բարձրացուած խնդիրները, առաջարկութիւնները, որից յետոյ
գտնում ընդհանուր լուծումներ:
Համաժողովի աւարտին դերասնաներից ոմանք հանդէս եկան
յայտարարութեամբ` յորդորելով Սեյրան Աւագեանին` ՀՀ նախագահին
հաղորդել իրենց ցանկութիւնը` անկախ խորհրդարանական
ընտրութիւնների արդիւնքներից, մշակոյթի անկուսակցական նախարար
ունենալու մասին:
Յիշեցնենք, որ ՀՀ մշակոյթի եւ երիտասարդության հարցերի
նախարար Յասմիկ Պողոսեանը առաջադրուած է Միաւորուած աշխատանքային
կուսակցութեան կողմից, սակայն, վերջերս նա յայտարարել է, որ ինքը
կապ չունի կուսակցութեան հետ: