2007 Թ. ԿԱՒԱՐՏՈՒԵՆ 4 ԽԱՂԱՐԿԱՅԻՆ ԵՎ 14 ՎԱՒԵՐԱԳՐԱԿԱՆ ՖԻԼՄԵՐԻ
ԱՇԽԱՏԱՆՔՆԵՐԸ
30-03-2007 18:49:00 | Հայաստան | Մշակոյթ
ԵՐԵՎԱՆ, 30 ՄԱՐՏԻ, ՆՈՅԵԱՆ ՏԱՊԱՆ: 2007 թուականին նախատեսուած է
աւարտել 4 խաղարկային` «Սողանք», «Նա եւ Նե», «Այգաբաց», «Չուող
թռչուններ» եւ 14 վաւերագրական ֆիլմ, այդ թւում` «Հեռու-մօտիկ»,
«Տոնինո Գուերան եւ Հայաստանը», «Հայոց այբուբենի 1600-ամեայ
գաղտնիքը»:
Ինչպէս «ՆՈՅԵԱՆ ՏԱՊԱՆ»-ի թղթակցի հետ զրոյցում նշեց
Հայաստանի ազգային կինոկենտրոնի տնօրէն Գեւորգ Գեւորգեանը, Ալբերտ
Մկրտչեանի «Այգաբաց» եւ Յարութիւն Խաչատրեանի «Չուող թռչուններ»
կինոնկարների նկարահանումներն արդէն աւարտուել են: Այս տարի
կկատարուեն դրանց ձայնագրման եւ մոնտաժային աշխատանքները:
Գ.Գեւորգեանի խօսքով, հայ-ռուսական համատեղ արտադրութեան
Միքայէլ Դովլաթեանի «Սողանք» ֆիլմն աւարտին հասցնելու նպատակով
բանակցութիւններ են տարւում ռուսական կողմի հետ:
Բացի այդ, արդէն աւարտուած են հայ-ֆրանսիական համատեղ
արտադրութեան «Խճճուած զուգահեռներ» ֆիլմի հայկական կողմի
աշխատանքները, իսկ ձայնագրման աշխատանքները, որ պէտք է կատարի
ֆրանսիական կողմը, կկատարուեն այս տարի: Կինոկենտրոնի տնօրէնը նշեց
նաեւ, որ մուլտիպլիկացիոն ֆիլմի ոլորտում կաւարտուեն Արման
Մանարեանի «Սասունցի Դավիթ» կինոնկարի 7-րդ, Ռոբերտ Սահակեանցի
«Ճանապարհ դէպի տուն» մուլտֆիլմի` 3-րդ, Գայեանէ Մարտիրոսեանի
«Վիշապագորգ»-ի` 2-րդ մասերը: Կաւարտուի նաեւ Նաիրա Մուրադեանի
«Մումի տրոլ» անիմացիոն ֆիլմը:
Նշենք, որ 2007 թուականի պետական բիւջէով կինոարտադրության
համար նախատեսուած է 587 մլն 385 հազար դրամ` նախորդ տարուայ 482 մլն
928 դրամի փոխարէն: Իսկ նախորդ տարի աւարտուել են եօթ խաղարկային,
երեք անիմացիոն կինոնկարների նկարահանումները: Նշուեց, որ
կինո-ֆոտո-ֆոնո հաւաքածուի պահպանման գծով բաւական մեծ գումար է
ծախսուել ֆիլմերի պատճենահանման եւ կինոնկարները թվային կրիչների
վրայ անցկացնելու համար: