ԱՐՄԱՆ ԲԱԲԱՋԱՆԵԱՆԻ ՊԱՇՏՊԱՆՆԵՐԸ ՄՏԱԴԻՐ ԵՆ ԴԻՄԵԼ ՀՀ
ՍԱՀՄԱՆԱԴՐԱԿԱՆ ԵՎ ՄԱՐԴՈՒ ԻՐԱՒՈՒՆՔՆԵՐԻ ԵՒՐՈՊԱԿԱՆ ԴԱՏԱՐԱՆՆԵՐ
12-03-2007 20:00:00 | Հայաստան | Հասարակութիւն
ԵՐԵՎԱՆ, 12 ՄԱՐՏԻ, ՆՈՅԵԱՆ ՏԱՊԱՆ: Մարտի 11-ին «Ժամանակ
Երեւան» թերթի նախկին գլխաւոր խմբագիր Արման Բաբաջանեանի
պաշտպաններին է վերադարձուել իրենց վճռաբեկ բողոքը: Այս մասին մարտի
12-ի ասուլիսում յայտնեցին լրագրողի պաշտպաններ Հայկ Ալումյանն ու
Զարուհի Փոստանջյանը: Ըստ պաշտպանական կողմի, վճռաբեկ բողոքը
վերադարձուել է օրէնքի կոպիտ խախտումներով. բողոքը ներկայացուել է
յունվարի 22-ին եւ այն ընդունելու կամ ընդունումը մերժելու
որոշումը պէտք է կայացուէր 10 օրուայ ընթացքում, այսինքն փետրուարի
1-ին: Մինչդեռ մարտի 6-ին փաստաբան Զ.Փոստանջյանի հարցմանն ի
պատասխան բանաւոր ասուել է, որ որեւէ որոշում ՀՀ Վճռաբեկ դատարանը
դեռեւս չի կայացրել: Մարտի 7-ին Վճռաբեկ դատարանին գրաւոր դիմելուց
յետոյ, որտեղ մատնանշվում էին օրէնքի խախտումները, ստացուել է
փետրուարի 26-ի` այսինքն յետին թվագրութեամբ որոշում` վճռաբեկ
բողոքը վերադարձնելու մասին: Պաշտպանները ուշադրութիւն հրաւիրեցին
նաեւ այն բանի վրայ, որ բողոքը ընդունելու մերժման որոշումը տրւում
է ստանդարտ պատճառաբանութիւն:
Պաշտպանական կողմը մտադիր է դիմել ՀՀ Սահմանադրական եւ Մարդու
իրաւունքների Եւրոպական դատարաններ: Որպէս դիմումի հիմք
ներկայացուելու են ՀՀ Սահմանադրութեան յոդուածների խախտումները.
մասնաւորապէս, սահմանադրութեամբ դատախազութիւնը չունի
նախաքննություն իրականացնելու լիազօրութիւն եւ նման լիազօրութիւն
թոյլ տուող քրէական դատաւարութեան օրէնսգրքի համապատասխան յօդուածը
հակասում է սահմանադրութեանը: Պաշտպանական կողմը մտադիր է նաեւ
վիճարկել վճռաբեկ բողոքը վերադարձնելու աբստրակտ ձեւակերպման,
ինչպէս նաեւ զորակոչից խուսափող անձանց քրէական
պատասխանատւութիւնից ազատող միջգերատեսչական յանձնաժողովի
լիազօրութեան սահմանադրականությունը: