ԵՎՐՈԽՈՐՀՐԴԱՐԱՆԸ ԴԱՏԱՊԱՐՏԵԼ Է ԵՄ ԵՐԿՐՆԵՐԻՆ ԿՀՎ-ԻՆ ՕԳՆԵԼՈՒ
ՀԱՄԱՐ
14-02-2007 20:58:00 | | Միջազգային
ԲՐԻՒՍԷԼ, 14 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Եւրոպական խորհրդարանը
հաւանութիւն է տուել մի զեկոյցի, որտեղ մի շարք երկրներ
քննադատութեան են ենթարկվում ահաբեկչութեան մէջ կասկածյալների
անօրինական ձերբակալութեան եւ փոխադրման հարցում Վաշինգտոնին
աջակցելու համար: Զեկոյցում ասւում է, որ 14 երկրներ, այդ թւում
Բրիտանիան, Գերմանիան եւ Լեհաստանը, աչք են փակել ԿՀՎ գործակալների
գործողութիւնների վրայ, որոնք տեղափոխել են Եվրոպայում
անօրինականօրէն ձերբակալուած կասկածյալներին, հաղորդում է BBC-ն:
Զեկոյցի հեղինակները պնդում են, որ ամերիկեան յատուկ
ծառայութիւնները 1200-ից աւելի գաղտնի թռիչքներ են իրականացրել,
ձերբակալուածներին տեղափոխելով այնպիսի երկրներ, ուր նրանք կարող
էին խոշտանգումների ենթարկուել:
Ամենախիստ քննադատութեան զեկոյցում ենթարկուել են Իտալիան,
Գերմանիան եւ Բրիտանիան:
Փաստաթղթում յատկապէս շեշտը դրւում է բրիտանական Արտաքին
գործերի նախարարութեան դիրքորոշման վրայ, որի ներկայացուցիչը
յայտարարել է, որ երկրի կողմից խոշտանգումների միջոցով ձեռք բերուած
տեղեկատուութեան օգտագործումը այն դէպքում, երբ երկիրն ինքը չի
մասնակցում խոշտանգումներին, ՄԱԿ-ի կոնվենցիայի խախտում չէ:
ԿՀՎ գործողութիւնների հարցը մէկ տարի շարունակ
ուսումնասիրուել էր Եվրոխորհրդարանի ստեղծած յատուկ յանձնաժողովի
կողմից: