Ոստիկանութեան օպերլիազորը մեղադրւում է շորթմամբ կաշառք
ստանալու մէջ
02-10-2009 17:44:00 | Հայաստան | Հասարակութիւն
ԵՐԵՎԱՆ, 2 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հայաստանի Յատուկ քննչական
ծառայութեան վարոյթում աւարտուել է ոստիկանութեան Նոր Նորքի
բաժնի քրէական հետախուզութեան բաժանմունքի աշխատակից Մհեր
Յովհաննիսեանի կողմից շորթմամբ կաշառք ստանալու դէպքի առթիւ
յարուցուած քրէական գործի նախաքննութիւնը: Նախաքննութեան
օրինականութեան նկատմամբ հսկողութիւն իրականացնող դատախազը
հոկտեմբերի 2-ին հաստատել է մեղադրական եզրակացութիւնը:
Նախաքննությամբ պարզուել է, որ յուլիսի 2-ին ՀՀ ոստիկանութեան
Նոր Նորքի բաժին բերման է ենթարկուել ՌԴ Կիսլովոդսկ քաղաքի
ոստիկանութեան կողմից հետախուզման մէջ գտնուող Կ.Դյոմենը: Վերջինից
կաշառք շորթելու նպատակով ոստիկանութեան նոյն բաժնի քրէական
հետախուզութեան բաժանմունքի օպերլիազոր Մ.Յովհաննիսեանը գաղտնի է
պահել նրա նկատմամբ որպէս խափանման միջոց ստորագրութիւնն ընտրուած
լինելու հանգամանքը եւ չկալանավորելու համար պահանջել 1000 ԱՄՆ
դոլար: Կ.Դյոմենը համաձայնել է օպերլիազորի պահանջին եւ նոյն օրը
նրան փոխանցել կաշառքի մի մասը 180 135 ՀՀ դրամին համարժէք 500 ԱՄՆ
դոլար: Կաշառքի մնացած 500 դոլարից մի մասը` 74 068 դրամին
համարժէք 200 ԱՄՆ դոլարը, Կ.Դյոմենը Մ.Յովհաննիսեանին է յանձնել
յուլիսի 31-ին, որը նոյն պահին յայտնաբերել եւ առգրաւել են ՀՀ
Ազգային անվտանգութեան ծառայութեան աշխատակիցները:
Ըստ ՀՀ Գլխաւոր դատախազութեան մամուլի ծառայութեան
հաղորդագրութեան, նախաքննությամբ ձեռք բերուած ապացոյցների հիման
վրայ Մ.Յովհաննիսեանին մեղադրանք է առաջադրուել ՀՀ Քրէական օրէնսգրքի
311-րդ յօդուածի 3-րդ մասի 1-ին եւ 3-րդ կետերով: Նրա նկատմամբ
որպէս խափանման միջոց է ընտրուել կալանքը: Քրէական գործն ուղարկուել
է Երեւանի Աւան եւ Նոր Նորք համայնքների առաջին ատեանի դատարան ըստ
էութեան քննելու համար: