ՀՀ սփիւռքի նախարարն ընդունել է Ուռոլոգների հայկական
ընկերակցութեան պատուիրակութեանը
23-09-2009 19:00:00 | Հայաստան | Հասարակութիւն
ԵՐԵՎԱՆ, 23 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ: ՀՀ
սփիւռքի նախարար Հրանուշ Յակոբեանը սեպտեմբերի 23-ին ընդունել է
սփիւռքահայ եւ հայաստանցի բժիշկների պատուիրակութեանը` Ուռոլոգների
հայկական ընկերակցութեան հիմնադիր-անդամ, Վիրաբոյժների եւ
Ուռոլոգների ամերիկեան ընկերակցությունների անդամ, դոկտոր,
պրոֆեսոր Կարօ Դերձակյանի եւ Ուռոլոգների հայկական ընկերակցութեան
նախագահ Յովհաննէս Աղաջանեանի գլխաւորութեամբ:
Հիւրերը տեղեկացրել են, որ սեպտեմբերի 25-26-ին կանցկացուի
Ուռոլոգների հայկական ընկերակցութեան 11-րդ համաժողովը, որին
կմասնակցեն հայաստանցի մօտ 120 եւ սփիւռքահայ շուրջ 80 բժիշկներ
ԱՄՆ-ից, Ֆրանսիայից, Մեծ Բրիտանիայից, Ռուսաստանից, Վրաստանից:
Հ.Յակոբեանը համաժողովի անցկացումը կարեւորել է ՀՀ Սփիւռքի
նախարարութեան համար ծրագրային խնդիրների` Սփիւռքի մասնագիտական
ներուժի բացայայտման, մասնագէտների տուեալների շտեմարանների,
համահայկական մասնագիտական ցանցերի ստեղծման տեսանկիւնից:
Ինչպէս տեղեկացանք նախարարութիւնից, հանդիպման ընթացքում
կարեւորվել է նաեւ Հայաստանում բժշկական համալսարանական կրթութեան
զարգացման, առողջապահական չափորոշիչների սահմանման եւ կիրառման,
բժիշկների եւ առողջապահական հիմնարկների որակաւորման ոլորտներում
արտերկրի առաջաւոր փորձի փոխառնման անհրաժեշտութիւնը:
Հիւրերն ընդգծել են համազգային, մասնաւորապէս, հայ-թուրքական
յարաբերութիւնների զարգացման խնդիրների շուրջ Հայաստան-Սփիռք
երկխօսութեան աշխուժացման, ինչպէս նաեւ թուրքերի կողմից
համացանցային հայկական կայքերի հասցէների վերաուղղորդման դէմ
քայլեր ձեռնարկելու անհրաժեշտութիւնը: ՀՀ սփիւռքի նախարարը
համոզմունք է յայտնել, որ տեղեկատուական անվտանգութեան այդ խնդիրը
եւս անհրաժեշտ է կարգաւորել հայաստանցի եւ սփիւռքահայ բարձրակարգ
մասնագէտների նպատակային ներգրաւման միջոցով: