Մինսկում նշել են Հայաստանի Հանրապետութեան Անկախութեան օրը
22-09-2009 19:25:00 | | Մշակոյթ
ՄԻՆՍԿ, 22 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ:
Սեպտեմբերի 17-ին Մինսկի Երաժշտութեան ակադեմիայի համերգասրահում
կայացել է համերգ` նուիրուած Հայաստանի Հանրապետութեան Անկախութեան
օրուան: Այն գործընկեր բուհերի` Բելոռուսիայի պետական երաժշտական
ակադեմիայի եւ Երեւանի Կոմիտասի անուան պետական կոնսերուատորիայի
ստեղծագործական նախագիծն էր:
Համերգը կազմակերպել է Բելոռուսիայի պետական երաժշտականւ
ակադեմիայի դոցենտ Վալտեր Մնացականովը, որը դիրիժոր է աշխատել
Չելյաբինսկի եւ Սամարղանդի, Գրոզնու եւ Օմսկի թատրոններում: Այժմ
Վալտեր Մնացականովը Բելոռուսիայի պետական երաժշտական ակադեմիայի
օպերային ստուդիայի դիրիժորն է:
Ինչպէս հաղորդում է Ռուսաստանի հայերի «Երկրամաս» թերթը,
վկայակոչելով Բելառուսի հայերի վեբ-պորտալը, համերգը բացուել է Նինո
Ռոտի կինֆիլմերի երաժշտութեան հիման վրայ սիմֆոնիկ նուագախմբի համար
գրուած ֆանտազիայով, որից յետոյ հնչել է Արամ Խաչատրեանի ջութակի
կոնցերտը: Այնուհետեւ ելոյթ է ունեցել միջազգային մրցոյթների
դափնեկիր, Բելոռուսիայի պետական երաժշտական ակադեմիայի
նվագախմբային ֆակուլտետի մագիստրատուրայի ուսանողուհի Տատեանա
Կորմազինովան` կատարելով Ժան-Պիեռ Ռամպալի ֆլեյտայի համար
փոխադրությունը: Համերգի առաջին բաժինը փակել է Առնօ Բաբաջանեանի
«Հերոսական բալլադը» ֆլեյտայի եւ նուագախմբի համար: Մենակատարն էր
միջազգային մրցոյթների դափնեկիր, Երեւանի Կոմիտասի անուան
կոնսերուատորիայի ուսանողուհի Սոնա Բարսեղեանը: «Հերոսական բալլադը»
առաջին անգամ է կատարուել Մինսկում: Բոլոր կատարումների ժամանակ
հանդէս է եկել Բելառուսի Հանրապետութեան ազգային պետական
հեռուստառադիոընկերության սիմֆոնիկ նուագախումբը:
Երկրորդ բաժինը սկսուել է հայ հեղինակների չորս
ստեղծագործություններով` Արամ Խաչատրեան, «Տոկատա դաշնամուրի
համար», Սայաթ-Նովա - Գ. Սարաջյան, «Քանի վուր ջան իմ»,
Կոմիտաս-Անդրէասեան, «Գարուն ա», Կոմիտաս - Գ. Սարաջյան,
«Հաբրբան»: Բոլոր չորս կոմպոզիցիաները կատարել է Երեւանի Կոմիտասի
անուան պետական կոնսերուատորիայի պրոֆեսոր Արմինէ Գրիգորեանը: Յետոյ
հնչել են բելոռուս հեղինակների ստեղծագործութիւններ` Ա.
Տուրենկով, «Մեղեդի», Վ. Մնացականով, «Չապլինապատում», «Թիթեռնիկ»:
Կատարող` միջազգային մրցոյթների դափնեկիր, Բելոռուսիայի պետական
երաժշտական ակադեմիային կից Հանրապետական երաժշտական ուսումնարանի
երրորդ կուրսի սովորող, կլարնետահար Կիրիլ Տելեպնեւը: Դաշնամուրի
պարտիան կատարել է միջազգային մրցոյթների դիպլոմանտ Իրինա
Տելեպնեւան: Համերգը աւարտել են Ա. Յարութիւնեանի եւ Ա.
Բաբաջանեանի «Կոնցերտային ռապսոդիան երկու դաշնամուրի համար»,
ինչպէս նաեւ Կոմիտասի եւ Գ. Սարաջյանի «Վաղարշապատի պարը» Արմինէ
Գրիգորեան եւ Սոնա Բարսեղեան դաշնամուրային զույգի կատարմամբ: