«Հայջրմուղկոյուղի»-ն դեռեւս չի կարողանում բնակչութեանը
ապահովել 24 ժամեայ ջրամատակարարում
14-04-2009 17:04:00 | Հայաստան | Տնտեսութիւն
ԵՐԵՎԱՆ, 14 ԱՊՐԻԼԻ, ՆՈՅԵԱՆ ՏԱՊԱՆ: «Հայջրմուղկոյուղի»
ընկերութիւնը ՀՀ կառավարութիւն է ներկայացրել Համաշխարհային
բանկի կողմից լրացուցիչ ֆինասավորված 26 մլն դոլար արժողութեամբ
երկրորդ վարկային արտօնեալ ծրագիրը: Ինչպէս ապրիլի 14-ի ասուլիսում
յայտնեց ընկերութեան գլխաւոր տնօրէն Պատրիկ Լորին, այն
նպատակաուղղուած է ընդլայնելու առաջին ծրագրի նուաճումները: Ըստ նրա,
ՀԲ-ի ծրագրով կիրականացուեն, մասնաւորապէս, Հրազդան քաղաքի
ջրամատակարարման ցանցերի վերանորոգման աշխատանքներ:
Պ.Լորիի խօսքերով, ընկերութեանը 46 մլն ԱՄՆ դոլարի չափով
դրամաշնորհներ կտրամադրուեն նաեւ Ասիական բանկի կողմից: Այդ
գումարները կուղղուեն Գորիս, Էջմիածին քաղաքների եւ մի շարք
գիւղական բնակավայրերի ջրամատակարարման համակարգերի
վերանորոգմանը:
Պ.Լորին յայտնեց նաեւ, որ ընկերութիւնը այս տարի կաւարտի
ԱՄՆ-ի Միջազգային զարգացման գործակալութեան կողմից ֆինանսաւորւող
ծրագիրը, որի շնորհիւ կբարելաւուի Արտաշատի եւ հարակից 28 գիւղական
համայնքների ջրամատակարարումը: Միաժամանակ նշուեց, որ Վերակառուցման
եւ զարգացման եւրոպական բանկի տրնամադրած մօտ 12 մլն եւրոյով
ընկերութիւնը իրականացրել է Սեւանայ լճի, ինչպէս նաեւ Սեւան,
Գաւառ, Մարտունի, Ջերմուկ քաղաքների կոյուղիների եւ կեղտաջրերի
մաքրման աշխատանքներ:
Պ.Լորիի խօսքերով, 2004թ.-ից ստանձնելով «Հայջրմուղկոյուղու»
ղեկավարութիւնը ֆրանսիական ՍԱՈՒՌ ընկերութիւնը նախատեսել էր
ապահովել 24 ժամեայ ջրամատակարարում: Ընկերութիւնը կարողացաւ
ջրամատակարարման գրաֆիկը օրական միջին 6 ժամի փոխարէն 2008թ.-ին
հասնել մինչեւ 12 ժամի: Սակայն, ըստ Պ.Լորիի, իրենց առաջնահերթ
խնդիրներից մէկը մնում է բնակչութեանը 24 ժամեայ ջրամատակարարմամբ
ապահովելը: Միջազգային տարբեր կառոյցների կողմից յատկացւող
գումարները եւս կուղղուեն այդ նպատակին:
Նշվածին զուգահեռ հանրապետութիւնում իրականացւում են ջրային
կորուստների կրճատման աշխատանքներ: Սակայն, ըստ Պ.Լորիի, դրանք
կարելի է անբաւարար համարել, քանի որ, եթէ 2004թ.-ի վերջին ջրային
կորուստները կազմում էին 92-93%, ապա 2008թ.-ին` 83-84%: