Մարդու իրաւունքների պաշտպանը եւ իրաւագիտակցութեամբ օժտուած հասարակութիւնը կը սպասեն Արդարադատութեան խորհրդի կարգապահական յանձնաժողովի արդար որոշմանը: Այս մասին օգոստոսի 22-ին յայտարարել է Հայաստանի Մարդու իրաւունքների պաշտպան Կարէն Անդրէասեանը։ «Գոնէ այս որոշումը կայացնելիս, յուսով ենք, նրանց կը յաջողուի դրսեւորել միջազգային փաստաթղթերի, ՀՀ Սահմանադրութեան եւ օրէնքների` իրենց իմացութիւնը»,- նշւում է Պաշտպանի յայտարարութեան մէջ։ Յիշեցնենք, որ Պաշտպանը օգոստոսի 18-ին երեք դատաւորի կարգապահական պատասխանատուութեան ենթարկելու հաղորդումներ էր ներկայացրել Արդարադատութեան խորհուրդ։ Նրա գնահատմամբ, դատաւորներ Երեմ Եսոյանը, Մասիս Ռեհանեանը եւ Իւրիկ Իսկոյեանը «վերջին մէկ տարուայ ընթացքում թոյլ են տուել օրէնքի նորմերի ակնյայտ եւ կոպիտ խախտումներ»: Օգոստոսի 19-ին ՀՀ Վճռաբեկ դատարանն իր հերթին հրապարակել էր հաղորդագորութիւն, որով քննադատել է ՀՀ Մարդու իրաւունքների պաշտպան Կարէն Անդրէասեանին` երեք դատաւորների կողմից «օրէնքի նորմերի ակնյայտ եւ կոպիտ խախտումներ» թոյլ տալու մասին հրապարակային հաղորդագրութիւն տարածելու համար: «Քանի դեռ ՀՀ Արդարադատութեան խորհուրդը դատաւորների գործողութիւնները չի համարել օրէնքի ակնյայտ եւ կոպիտ խախտում, որեւէ այլ պետական մարմին իրաւասու չէ հրապարակայնօրէն նման գնահատականներ տալ»։ Մարդու իրաւունքների պաշտպանն ի պատասխան, իր կողմից կարգապահական վարոյթի գաղտնիութեան խախտման մասին ՀՀ վճռաբեկ դատարանի մեղադրանքը գնահատել է որպէս ապատեղեկատուութիւն։ «Ըստ օրէնքի, դատաւորներին կարգապահական պատասխանատուութեան ենթարկելու վերաբերեալ Պաշտպանի հաղորդումները ՀՀ արդարադատութեան խորհրդի կարգապահական յանձնաժողովին ներկայացնելու եւ դրանց մասին տեղեկատուութիւն տարածելու փուլում կարգապահական վարոյթ դեռեւս յարուցուած չէ: Հետեւաբար, կարգապահական վարոյթի ընթացքին առնչուող կանոնների վկայակոչումը պարզապէս անհեթեթ է: Եթէ Պաշտպանը (ինչպէս եւ որեւէ այլ անձ) օրէնքով սահմանուած դէպքերում ու կարգով ներգրաւուի կարգապահական վարոյթին, ապա այդ պարագայում արդէն գաղտնիութեան դրոյթները կտարածուէն նաեւ իր վրայ: Պաշտպանն իր գործունէութիւնն իրականացնում է հրապարակային, բաց եւ թափանցիկ բոլոր այն դէպքերում, երբ օրէնքն ուղղակիօրէն ու յստակ չի արգելում Պաշտպանին այդպէս գործել»,- նշւում է Պաշտպանի յայտարարութեան մէջ: Իսկ Վճռաբեկ դատարանի յորդորը «յետագայում ձեռնպահ մնալ նման գործելաոճից», ըստ Պաշտպանի, «կարող է ապագայում դիտարկուել որպէս Պաշտպանի որոշումների վրայ ազդելու նպատակով նրա գործունէութեանը միջամտութիւն կամ պաշտօնատար անձանց կողմից Պաշտպանի օրէնքով սահմանուած լիազօրութիւնների իրականացմանը խոչընդոտում կամ Պաշտպանին ուղղուած սպառնալիք, որոնց համար օրէնքով սահմանուած է ընդհուպ մինչեւ քրէական պատասխանատուութիւն»:

---