Մտքերի փոխանակման հարթակ՝ հաշմանդամություն ունեցող անձանց կարիքներն հոգալու համար
30-04-2014 17:54:08 | Հայաստան | Բարեգործություն
Երևանում ԵԱՀԿ աջակցությամբ կազմակերպված կլոր սեղանի շուրջ քննարկվող թեմաների շարքում էին հաշմանդամություն ունեցող անձանց բարձրագույն կրթության հնարավորությունները, խնդիրներն ու մարտահրավերները:
Միջոցառումը կազմակերպվել է ԵԱՀԿ երևանյան գրասենյակի, «Հույսի կամուրջ» ՀԿ-ի և Հայաստանում Տեմպուս ծրագրի ազգային գրասենյակի կողմից (որը ֆինանսավորվում է ԵՄ-ի կողմից)՝ նպատակ ունենալով ստեղծելու տեղեկատվության և մտքերի փոխանակման հարթակ՝ հաշմանդամություն ունեցող անձանց կարիքներն ավելի արդյունավետ հոգալու համար:
«ԵԱՀԿ-ն իր 57 մասնակից պետություններում խթանում է ներառումը՝ որպես ժողովրդավարացման նախադրյալ: Կրթության մատչելիությունը կարևոր է հատկապես հաշմանդամների համար», նշեց ԵԱՀԿ երևանյան գրասենյակի ժողովրդավարացման ծրագրերի ղեկավար՝ Օլիվեր Մակքոյը: «Ես ուրախ եմ մասնակցել այսօրվա քննարկմանը և կարծում եմ, որ սա երկխոսության այն տեսակն է, որի կարիքը կա Հայաստանի կրթական հաստատությունների հետագա զարգացման համար:»
Այսօրվա քննարկմանը մասնակցում են Հայաստանի տարբեր կրթական հաստատությունների, ինչպես նաև ՀԿ-ների և նախարարությունների ներկայացուցիչներ, որոնք կարևորում են հաշմանդամություն ունեցող անձանց ներառական կրթության, հասարակությունում ինտեգրման և նրանց հանդեպ խտրականության բացառման անհրաժեշտությունը:
Հայաստանում Տեմպուս ծրագրի ազգային գրասենյակի համակարգող Լանա Կառլովան հավելեց. «Ծրագիրը նպատակ ունի խթանելու և զարգացնելու հատուկ կարիքներ ունեցող անձնաց կրթական հնարավորությունները: Կրթական հաստատություններում պրոֆեսիոնալ մոտեցման շնորհիվ կբարձրանա այդ անձանց ներգրավվածությունը հասարակական կյանքին: Անհրաժեշտ է ապահովել հատուկ կարիքներ ունեցող անձանց իրավունքները»:
Միջոցառումն իրականացվում է հաշմանդամություն ունեցող անձանց կրթական իրավունքի ազգային իրազեկման օրվա և «Հատուկ կարիքներով անձանց հասանելիությունը հասարակությանը» (ՀԿԱՀՀ) ծրագրի շրջանակներում: Վերջինս ներառում է Եվրասիա միջազգային համալսարանի կողմից համակարգվող տեղեկացվածության բարձրացմանն ուղղված տարբեր միջոցառումներ՝ հայաստանյան բարձրագույն կրթական հաստատություններում:
ԵԱՀԿ երևանյան գրասենյակը խթանում է երիտասարդների կարողությունների ամրապնդումը՝ Հայաստանում ներառական և ներկայացուցչական ժողովրդավարական զարգացմանը ներդրում ունենալու համար:
ՀԱՅԵՐԵՆ
Русский
English
Դաս. հայերեն
French
