Սույն թվականի դեկտեմբերի 23-ին Վայրի բնության և մշակութային արժեքների պահպանման
հիմնադրամը (FPWC) և հիմնադրամի գլխավոր գործընկեր ՎիվաՍել-ՄՏՍ-ն ամփոփել և
ներկայացրել են «Այլընտրանքային էներգիա» ծրագրի շրջանակում համատեղ իրականացվող
հերթական նախագծի արդյունքները: Նախագծի շրջանակում Պարույր Սևակ գյուղի
մանկապարտեզում տեղադրվել է արևային ջրատաքացուցիչ և էլեկտրական ջեռուցման
համակարգ: Շնորհանդեսը կայացավ գյուղի մանկապարտեզում, որն ունի 2 սենյակ և 16 երեխա:
Միջոցառման հյուրերն էին ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, FPWC-ի
հիմնադիր Ռուբեն Խաչատրյանը և Պարույր Սևակ համայնքի ղեկավար Էդուարդ Ստեփանյանը:
«Հին ժամանակներում իմաստուններն ասում էին, որ Երկրագունդը պետք է սիրել և պահպանել,
քանի որ այն ոչ թե ժառանգել ենք մեր ծնողներից, այլ պարտք ենք վերցրել մեր երեխաներից:
Բնությունն անչափ հարուստ է ռեսուրսներով, բայց մենք պետք է խնայողաբար օգտագործենք
դրանք՝ հնարավորության դեպքում ընտրելով պակաս վնասակար կամ լիովին անվնաս
տարբերակներ: Արդեն ամբողջ աշխարհն է գիտակցում էկոլոգիական աղետների պատճառներն
ու դրանց հետևանքների լրջությունը, և բազմաթիվ երկրներ պատասխանատու մոտեցում են
ցուցաբերում շրջակա միջավայրի հանդեպ` օգտվելով այլընտրանքային էներգիայի
աղբյուրներից: Սա ոչ թե առանձին երկրների, այլ ամբողջ մարդկության պայքարը պետք է լինի, և
միանալով դրան՝ մեկ անգամ ևս հավաստում ենք մեր քաղաքակիրթ և գիտակից մոտեցումը»,-
ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
Արևային ջեռուցման և ջրատաքացուցիչ համակարգն ունի ջրատաքացուցիչ 2 կոլեկտոր,
յուրաքանչյուրը՝ վակուումային 30 խողովակով (ընդհանուր՝ 60 հատ): Հայաստանում, ի դեպ,
70մմ տրամագծով վակուումային խողովակներն առաջին անգամ են գործարկվում (մինչ այժմ
շահագործվող խողովակների տրամագիծը չի գերազանցել 58մմ-ը) և առավել արդյունավետ են:
Վակուումային մեկ խողովակի երկարությունը 2.1մ է: Համակարգն ունի նաև 300 լիտր
տարողությամբ երկկոնտուր ջերմափոխանակիչ բաք, ինչպես նաև ղեկավարման համակարգ` իր
պոմպով: Բացի այդ, մանկապարտեզում տեղադրվել է ջեռուցման էլեկտրական կաթսա՝ 15KW
հզորությամբ և ջեռուցման ընդհանուր համակարգ՝ 8 հատ ջեռուցման մարտկոցով:
Մանկապարտեզում տեղադրված արևային ջրատաքացուցիչը ջեռուցման էներգաարդյունավետ
և բնապահպանական տեսանկյունից արդարացված միջոց է: Այս համակարգը ձմռանը 50-60%-
ով նվազեցնում է ջեռուցման ծախսը, իսկ ամռանը` 100%-ով տաք ջրի ծախսը: Ծրագրի շնորհիվ
սպասվում է նաև մանկապարտեզ հաճախող երեխաների քանակի աճ:
Պարույր Սևակ գյուղը, որը նախկինում ունեցել է Սևակավան
անվանումը, հիմնադրվել է 1978 թ.-ին և ունի 577 բնակիչ: Գյուղի բնակչությունը գաղթել է
տարբեր հարակից համայնքներից, ինչպես նաև Ադրբեջանից:
«Այլընտրանքային էներգիա» ծրագրի մասին
Ծրագրի նպատակն է կանխարգելել շրջակա միջավայրի աղտոտումը` հնարավորություն
ընձեռելով օգտագործել այլընտրանքային էներգիայի աղբյուրներ: Տասն ամիս տևողությամբ
ծրագիրը, որն իրականացվելու է Գեղարքունիքի (Վահան և Ծովագյուղ) և Արարատի (Պարույր
Սևակ, Շաղափ, Լանջանիստ և Ուրցաձոր) մարզերի վեց համայնքներում, պարունակում է երկու
բաղադրիչ` դասընթացներ տեղաբնակների համար և աջակցություն` համայնքներին
այլընտրանքային էներգիայի աղբյուրների օգտագործման բնագավառում (արեգակնային
ջեռուցման համակարգ, էլեկտրական ցանկապատեր, LED փողոցային լուսավորություն): Քանի
որ Հայաստանն ունի արևային էներգիայի մեծ պաշար՝ այլընտրանքային էներգիայի և
էներգախնայող տեխնոլոգիաների ներդրումը կարող է բարձրացնել տվյալ համայնքների
տնտեսությունների էներգետիկ արդյունավետությունը և նպաստել բնապահպանական ու
սոցիալական խնդիրների լուծմանը: Ծրագիրը հավակնում է դառնալ Վայրի բնության և
մշակութային արժեքների պահպանման հիմնադրամի (FPWC) և ՎիվաՍել-ՄՏՍ-ի
երկարաժամկետ համագործակցության նոր ձևաչափ` բնապահպանության և բնական
ռեսուրսների կայուն օգտագործման բնագավառում: Կողմերը մեծապես կարևորում են բնության
պահպանության ոլորտում նորագույն տեխնոլոգիաների օգտագործումը, որն իր հերթին
կնպաստի շրջակա միջավայրի պահպանությանը, էներգախնայողության բարձրացմանը և
համայնքների զարգացմանը:
Վայրի բնության և մշակութային արժեքների պահպանման հիմնադրամի մասին
Վայրի բնության և մշակութային արժեքների պահպանման հիմնադրամի առաքելությունն է
Հայաստանի բացառիկ բնական ժառանգության պահպանությունը: Աշխատելով վայրի բնության
պահպանության, բնապահպանական կրթության և համայնքային զարգացման խաչմերուկում՝
հիմնադրամը կարևորում է գյուղական բնակչության ներգրավումը Հայաստանի կայուն
առաջընթացում: Հիմնադրամի գործունեությունն ուղղված է մարդ-վայրի բնություն
հակամարտության և դրա հետևանքների նվազեցմանը, ինչը նախապայման է Հայաստանի
դրական զարգացման:
Մեդիա տեղեկատու
Ագնեսա Կարապետյան, ծրագրի համակարգող, 093219618, agnesa.karapetyan@fpwc.org
Սյուզաննա Պետրոսյան, FPWC լրատվական բաժին, 077933772, syuzanna.petrosyan@fpwc.org
Գրանցման համար նախապես զանգահարել FPWC գրասենյակ, հեռ. 010 585884 կամ 010 555209
ՀԱՅԵՐԵՆ
Русский
English
Դաս. հայերեն
French
