Արագածոտնի մարզի Արտենի համայնքում հունիսի 1-ին բացվեց համայնքային լոգոպեդի սենյակը:
Հայաստանի մանուկներ հիմնադրամի (COAF) լոգոպեդ Նանե Մանուկյանը, ով աշխատում էր Արտենիում շաբաթական մեկ օր, Արտենիի համայնքապետ Գեղամ Խլղաթյանի նախաձեռնությամբ այսուհետ ծառայելու է ամբողջ համայնքի մանուկներին:
Գյուղապետի համար որոշման հիմք ծառայեց իր բարեկամներից մեկի զավակը, ով ընդգրկվել էր Հիմնադրամի՝ խոսքի դժվարություններ ունեցող երեխաների աջակցության ծրագրում: Մինչ այդ երեխան բաղաձայն հնչյունները չէր կարողանում արտասանել, սակայն այժմ խոսքը գրեթե ամբողջությամբ շտկվել է:
«COAF-ի ծրագրի օգտակարությունն ակնհայտ էր, ցանկացա ինքս էլ ներդրում ունենալ այդ գործում: Արդյունքում որոշեցինք, որ գյուղում պետք է անպայման լոգոպեդի հաստիք լինի, որպեսզի մասնագետը կարողանա ավելի շատ ժամանակ տրամադրել մեր համայնքի երեխաներին»,- ասաց համայնքապետ Գեղամ Խլղաթյանը:
Հայաստանի մանուկներ հիմնադրամի Երեխայի և ընտանիքի աջակցության ծրագիրը գյուղական համայնքներում լոգոպեդական ծառայություն է իրականացնում 2011 թ.-ից: Այս պահին Արագածոտնի և Արմավիրի մարզերի 7 համայնքների 92 երեխա ծրագրի շահառու է:
Արտենիում ծրագիրը գործում է արդեն 1 տարի՝ սպասարկելով նախադպրոցական և դպրոցական տարիքի 8 երեխաների, ովքեր լոգոպեդի հետ աշխատանքի կարիք ունեն:
COAF «Աջակցություն խոսքի դժվարություն ունեցող երեխաներին» ենթածրագրի շրջանակներում գործող Արտենիի լոգոպեդական սենյակը համայնքապետարանի աջակցությամբ համալրվեց դիդակտիկ նյութերով, խաղերով և ծառայությանն անհրաժեշտ կահավորանքով:
«Շատ կարևոր է, որ տեղական իշխանությունները գնահատում են համայնքի համար անհրաժեշտ այս ծառայությունը, ներդրում են կատարում համայնքում՝ ապահովելու ծառայության կայուն հասանելիությունը»,- նշեց Հայաստանի մանուկներ հիմնադրամի գործադիր տնօրեն Անուշ Եդիգարյանը:
Հունիսմեկյան տրամադրությունը նաև ամբողջ համայնքում էր. սենյակի բացումից հետո մշակույթի կենտրոնի սաները, գյուղի տաղանդաշատ երեխաները ելույթ ունեցան իրենց տարեկիցների, կրտսերների և համայնքի հյուրերի համար:
ՀԱՅԵՐԵՆ
Русский
English
Դաս. հայերեն
French
