ԱՄՈՒԼՍԱՐԸ ՄԵՆՔ ԵՆՔ...«Ամուլսարն առանց հանքի» նախաձեռնության հայտարարությունը

18-09-2019 21:51:20 | Հայաստան | Հասարակություն

Հարգելի՛ հայրենակիցներ,

Հաշվի առնելով վերջին ամիսներին Ամուլսարի շուրջ ծավալվող իրադարձությունները, դրան զուգահեռ հետևելով երկրում տեղի ունեցող այլ քաղաքական և ոչ քաղաքական իրադարձություններին՝ ուզում ենք խոսել ավելի բաց և լինել ավելի հասկացված ժողովրդի կողմից։

Նախ եկեք ամրագրենք հետևյալը՝

1. Նախորդ իշխանությունների ներգրավումը այս պայքարի մեջ համարում ենք անհնարին, քանի որ այս կործանարար հանքի շահագործման թույլատվությունը, օրենքների խեղումը տեղի է ունեցել հենց իրենց օրոք։

Ավելին, մենք պահանջում ենք այսօրվա իշխանություններից հետևողական կերպով բացահայտել այն բոլոր խախտումները, որոնք տեղի են ունեցել նախորդների ժամանակ և կիրառել համապատասխան պատժամիջոցներ։

Ուստի ամրապնդենք հետևյալը. այս պայքարը ձկնորսների համար անպտղաբեր է։

2․ Մեր պայքարը թևակոխում է մի նոր փուլ, որտեղ մենք պետք է լինենք ավելի կազմակերպված, ավելի վճռակամ և քայլենք ավելի տրամաբանված քայլերով։

Խնդիրը վաղուց հատել է միայն բնապահպանական լինելու սահմանագիծը, քանի որ տեղի է ունենում մարդու իրավունքների կոպիտ անտեսում, զբոսաշրջային քաղաքի սոցիալական կարգավիճակի փոփոխություն, և հաշվի առնելով հանքի դիրքն ու բարձրությունը՝ բնապահպանական խնդիրներից ծնվում են նաև ռազմավարական և ազգային անվտանգությանը հարվածող ռիսկեր։

3․ Սկսել են նոր գրոհներ մեր պայքարի ուղղությամբ, մեզ արդեն հարվածում են մեր կողմից չսպասված ուժեր, ինչի մասին կխոսենք սեպտեմբերի 20-ին և դրանից հետո։ Մենք ժամանակ ենք տվել կառավարությանը մինչև ամսի 20-ը, և նորից ամրագրում ենք դա. մինչև սեպտեմբերի 20-ը սպասում ենք, որ կառավարությունը կփոխի իր որոշումը: Կոչ ենք անում, որ հանուն տնտեսական ժամանակավոր շահի, երկիրը չուղեկցել նոր ցնցումների և պառակտման։

4․ Սեպտեմբերի 20-ին տարբեր բնապահպանական և ոչ բնապահպանական կազմակերպությունների կողմից կազմակերպվում են ցանցային միջոցառումներ՝ միանալով միջազգային բնապահպանական օրվան։

«Ամուլսարն առանց հանքի» նախաձեռնությունը սեպտեմբերի 20-ին դուրս է գալու մեծ ու լայնածավալ իրազեկման ակցիայի, որի ընթացքում էլ արդեն կհայտարարվեն մեր հետագա անելիքները։

Ամփոփելով վերը գրվածը, ուզում ենք շեշտել հետևյալը՝

-Մեր պայքարն արդար է

-Մեր պայքարի մեջ ատելություն չկա ու չի լինելու

-Մենք դեմ չենք գնալու ոչ ոքի, մենք գնում ենք հանուն

Ամուլսարի ու տարածաշրջանի անվտանգության

-Մենք վճռակամ ենք ու գնալու ենք մինչև վերջ՝ մինչև լեռան ազատագրում, այլ տարբերակ չկա․․․

Ամուլսարը մեր հայրենիքի մի կտորն է, Ամուլսարը գտնվում է մեր հանրապետության ճիշտ կենտրոնում, Ամուլսարը մերն է, Ամուլսարը մենք ենք․․․

Նոյյան տապան - Հասարակություն