Ով է վճարում ցեղասպանության համար. մահվան հաշվապահություն

28-01-2020 12:19:17   | Հայաստան  |  Վերլուծություն
Թուրքիայի կառավարության հիմնադրամների կառավարման վարչությունը Ստամբուլի Սանասարյան տան վարձակալության տենդեր է հայտարարել: Մինչ այդ շենքը պատկանում էր Պոլսի հայոց պատրիարքարանին, բայց Թուրքիայի կառավարությունը բռնագրավել է: Հիմա դրա պատկանելությունը վիճարկվում է Թուրքիայի Սահմանադրական դատարանում:
 


Սանասարյան տունը 1881 թվականին կառուցել է Էրզրումցի հայ վաճառական ու բարեգործ Մկրտիչ Սանասարյանը: Բռնագրավումից հետո շենքում տեղակայվել է Ստամբուլի ոստիկանությունը, իսկ հետո՝ տնտեսական դատարանը:
 
Թուրքիայի կառավարությունը հայ համայնքին կվերադարձնի՞ Սանասարյան տունը: Թուրքիայի գործող իշխանություններն ասում են, որ թույլ չեն տա Ստամբուլը Կոնստանդնուպոլիս դարձնել, իսկ հայ պատրիարքը համառորեն կրում է Պոլսի պատրիարք անվանումը:
 
Աշխարհը նշում է Հոլոքոսթի՝ Երկրորդ համաշխարհային պատերազմում հրեաների ցեղասպանության օրը: Պատերազմից հետո հրեաները, որոնք ազգային պետության ռազմավարությունը մշակել էին դեռ 1890-ական թվականներին,
ստեղծեցին Իսրայել պետությունը եւ առ այսօր ռեպարացիաներ ու կենսաթոշակ են ստանում պետություններից, որոնց մեղադրում են Հոլոքոսթի իրագործման մեջ:
 
Օրերս Ռոտշիլդների ընտանիքը դատի է տվել Վիեննայի իշխանություններին 1938 թվականին նացիստների ազգայնացրած անշարժ գույքի օգտագործման համար, որը նախկինում պատկանել է Ռոտշիլդների ընտանիքին:
 
Տհաճ գործընթաց է սկսել նաեւ Լեհաստանի հետ կապված: Իսրայելը Լեհաստանին մեղադրում է Հոլոքոսթին աջակցելու մեջ: Եթե Լեհաստանը մեղավոր ճանաչվի, հավանաբար կհետեւեն հայցեր ու փոխհատուցումներ հրեաներին: Լեհաստանն օրերս հայտարարել է, որ ռազմատուգանքներ է պահանջում Գերմանիայից ու Ռուսաստանից, որոնց մեղավոր է համարում Երկրորդ համաշխարհային պատերազմի համար: Ռուսաստանի նախագահ Վլադիմիր Պուտինը նացիստական Գերմանիայում Լեհաստանի դեսպանին անվանել է «հակասեմիտ խոզ»:
 
Պատերազմների ու ցեղասպանությունների հաշվապահությունը տհաճ գործ է, բայց առանց իրավական գործընթացների ու քաղաքական աջակցության դժվար է հաշիվ ներկայացնել Թուրքիային: ԱՄՆ Կոնգրեսի երկու պալատների՝ Հայոց ցեղասպանությունը ճանաչող
բանաձեւերը կարող են ազդանշան լինել, որ ցեղասպանության զոհերի ժառանգները ձեւակերպեն իրենց պահանջները: Թուրքիայի կառավարությունն ստիպված է լինելու պատասխանել բազմաթիվ հարցերի, եւ Սանասարյան տունը ամենաանմեղ հարցերից մեկն է լինելու:
 
Օրերս Հայաստանի նախագահ Արմեն Սարգսյանն Իսրայելում առաջարկել է Իսրայելին աջակցել հայ ժողովրդին իր իրավունքների վերականգման գործում:
 
ՆԱԻՐԱ ՀԱՅՐՈՒՄՅԱՆ
Մեկնաբան
 
 
 
Նոյյան տապան   -   Վերլուծություն
Լուրեր Հայաստանից եւ Սփյուռքից

Կարդացել են 364 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար