2020թ. կհիմնանորոգվեն կրթամշակութային և առողջապահական մի շարք հաստատություններ, կբարեկարգվեն ճանապարհներ

24-02-2020 16:06:03   | Հայաստան  |  Հասարակություն
 


 
Այս տարի մայրաքաղաքում շինարարության և բարեկարգման աշխատանքները կընդգրկեն քաղաքային տնտեսության տարբեր ոլորտներ՝ մշակույթ, առողջապահություն, կրթություն, ճանապարհների բարեկարգում և այլն: Տարվա ընթացքում կհիմնանորոգվի մշակութային երեք կարևոր օջախ: Միանգամայն նոր պայմաններում կաշխատեն Պատանի հանդիսատեսի թատրոնը, Մանկապատանեկան ստեղծագործական քաղաքային կենտրոնը, Հայաստանի ժողովրդական նկարիչ Էդուարդ Իսաբեկյանի ցուցասրահը: 
 
Էդուարդ Իսաբեկյանի ցուցասրահում շուրջ 30 կտավ կա, միևնույնժամանակ սրահը զուրկ է
օդի խոնավության, լուսավորության ու ջերմաստիճանի անհրաժեշտ պայմաններից:
 
«Խնդիրը շատ հրատապ է, որովհետև կտավները վնասվել են: Ներկաշերտերը ուռել են, ճաքճքել, ափսոս են այս նկարները: Ցուցասրահը կսկսի աշխատել, վերածնունդ կունենա, կանենք շատ ցուցահանդեսներ»,- ասում
է «Էդուարդ Իսաբեկյան» ցուցասրահի վարիչ Իրինա Իսաբեկյանը:
 
Շինարարական աշխույժ եռուզեռ կլինի նաև համայնքային մանկապարտեզներում: Փոքրիկներին ավելի լավ կրթելու և դաստիարակելու համար կարևոր են նաև միջավայրի պայմանները:
 
«Ասիական զարգացման բանկի ծրագրով ունենք բավականին շատ ծավալներ՝ մոտ 30 մանկապարտեզի, մեր ծրագրերով էլ 9 մանկապարտեզի մրցույթների նախագծերը պատրաստ են, տեղադրել ենք արդեն, որ շինարարություն իրականացվի»,- նշում է Երևանի քաղաքապետարանի շինարարության և բարեկարգման վարչության պետ Գրիգոր Հարությունյանը:
Երևանում նախորդ տարվա 5000 քմ-ի փոխարեն այս տարի կրկնակի շատ՝ 10.000 քմ հողային պաստառով ճանապարհ կբարեկարգվի: Ծավալի առումով զգալի աշխատանքներ կտարվեն նաև այգիների, նոր մայթեր կառուցելու ու բարեկարգելու, եզրաքարեր փոխելու, հենապատեր կառուցելու և ոռոգման նոր ցանց անցկացնելու համար: 2020-ին կբարեկարգվի նաև հետիոտնային ստորգետնյա 4 անցում:
 
«Նախորդ տարի ստորգետնյա 4 անցում բարեկարգեցինք: Այս տարի 300 մլն.-ի բյուջե ենք հաստատել և նախագծերն արդեն պատվիրել ենք: Խոսքը Գրիգոր Լուսավորչի փողոցի, փակ շուկայի մոտի, Ազատության պողոտայի («Լամբադա» կամուրջ) և Թամանցիների փողոցի գետնանցումների մասին է»,- նշում է Գրիգոր Հարությունյանը:
 
Առողջապահության առաջնային օղակը ևս ուշադրության կենտրոնում է: Պոլիկլինիկաները բուժսարքավորումներով վերազինման ծրագրին զուգահեռ՝ բուժկենտրոններում հիմնանորոգման ու վերանորոգման աշխատանքներ կիրականացվեն: Այս տարի ծրագրում համայնքային 5 պոլիկլինիկա է ընդգրկված: Շուրջ 8000 քմ տարածք ունեցող թիվ 12 պոլիկլինիկան կվերանորոգվի փուլ առ փուլ: Այս տարի կլուծվի սանհանգույցների ու շենքի ողջ էներգամատակարարման խնդիրը, կփոխարինվեն կաբինետների դռները:
 
 
Նոյյան տապան   -   Հասարակություն
Լուրեր Հայաստանից եւ Սփյուռքից

Կարդացել են 381 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար