Անբավարար գնահատելուց զատ, վարչապետը պետք է հայտարարեր կոնկրետ պաշտոններից ազատումների մասին. Ստյոպա Սաֆարյան (ՏԵՍԱՆՅՈՒԹ)
27-02-2020 12:41:31 | Հայաստան | Հասարակություն
Անբավարար գնահատելուց զատ, վարչապետը պետք է հայտարարեր կոնկրետ պաշտոններից ազատումների մասին:
Այս մասին «Նոյյան Տապան»-ի թղթակցի հետ զրույցում նշեց Հանրային խորհրդի (ՀԽ) նախագահ, Միջազգային և անվտանգության հարցերի հայկական ինստիտուտի (ՄԱՀՀԻ) հիմնադիր Ստյոպա Սաֆարյանը՝ անդրադառնալով կոռուպցիայի դեմ պայքարի վերաբերյալ երեկ վարչապետ Նիկոլ Փաշինյանի կողմից արված հայտարարություններին:
Ըստ նրա՝ հասարակության համար կառավարությունում հրավիրված խորհրդակցությունն ավելի ընկալելի կլիներ, եթե դրա ընթացքում վարչապետի հնչեցրած գնահատականները զուգակցված լինեին կոնկրետ պաշտոնանկություններով:
Ս. Սաֆարյանի կարծիքով, հետևանքները շատ ցավոտ կլինեն, եթե հայտարարություններին կոնկրետ պատժիչ գործողություններ չհետևեն:
«Ես որպես ՀՀ քաղաքացի ակնկալում եմ, որ այս հայտարարությունները շարունակություն ունենան: Ես տեսնում եմ վարչապետի բարձր քաղաքական կամքը պայքարելու այդ երևույթների դեմ, ես ընդունում եմ այն ուղերձները, որ ինքը տվել է մինչև այժմ կատարված պաշտոնանկությունների տեսքով, ես սպասում եմ, որ այդ հայտարարություններն ամրագրված լինեն նույնպիսի պաշտոնանկություններով»,- ընդգծեց ՀԽ նախագահը:
Վերջինիս խոսքերով՝ մինչ այժմ կոռուպցիոներների կողմից պետությանը պատճառված վնասների պետբյուջե վերականգնումների ծավալների աճ հնարավոր է արձանագրել այն դեպքում, երբ իրավապահ համակարգը կազատվի նախկինների հետ սերտ կապերի մեջ գտնվող պաշտոնյաներից.
«Օր առաջ պետք է սկսվեն ցավոտ, բայց պահանջված ռեֆորմներ ուժային կառույցներում: Հայաստանը և պարոն Փաշինյանի թիմը չեն կարողանալու առաջ շարժվել, եթե սա չի արվի»: