ՓՄՁ-ների օժանդակության ծրագիրը չի ներառում առևտրով զբաղվող կազմակերպություններին. Էկոնոմիկայի փոխնախարարը՝ ծաղկավաճառներին աջակցելու մասին
27-03-2020 16:55:57 | Հայաստան | Հասարակություն
Փոքր և միջին ձեռնարկությունների օժանդակության ծրագիրը չի ներառում առևտրով զբաղվող կազմակերպություններին:
Այս մասին մարտի 27-ին կառավարությունում հրավիրված ասուլիսի ընթացքում հայտարարեց ՀՀ էկոնոմիկայի նախարարի տեղակալ Նաիրա Մարգարյանը՝ պատասխանելով լրագրողի այդ հարցին, թե պետությունն ինչ աջակցություն է նախատեսում ծաղկավաճառների համար, որոնք երկրում ստեղծված ներկայիս իրավիճակում տուժում են:
Ըստ նրա, եթե ծաղկավաճառները բացի վաճառելուց, զբաղվում են նաև ծաղիկների աճեցմամբ, ապա կարող են դիմել Կառավարության կողմից մշակված աջակցության երկրորդ փաթեթին:
«Եթե բանկը կորոշի, որ ցանկություն ունի համագործակցել և վարկավորել տվյալ տնտեսվարող սուբյեկտին առաջին փաթեթի միջոցառումների շրջանակներում, այնտեղ նախատեսված է համաֆինասավորում, վերաֆինանսավորում և սուբսիդավորում աջակցության գործիքները, իսկ տնտեսվարողն էլ կկարողանա ապացուցել բանկին, որ ինքը վարկունակ է և կարող է համագործակցել, ապա կստանա այդ աջակցությունը»,- մանրամասնեց Ն. Մարգարյանը՝ հավելելով, որ այս դեպքում բանկերն իրենք են գնահատում ռիսկերը և որոշում կայացնում: