ԱԺ-ն երկրորդ ընթերցմամբ չընդունեց աղմկահարույց նախագիծը. Փոխադարձ մեղադրանքներ հնչեցրին Լիլիթ Մակունցն ու Էդմոն Մարուքյանը
31-03-2020 14:01:36 | Հայաստան | Հասարակություն
Այսօր ընդդիմությունն իր կրավորական կեցվածքով նպաստում է նրան, որպեսզի բուժհամակարգը պարալիզացվի:
Այս մասին Ազգային ժողովում հայտարարեց «Իմ քայլը» խմբակցության ղեկավար Լիլիթ Մակունցն այն բանից հետո, երբ երկրորդ ընթերցմամբ քվերակության դրվեց «Արտակարգ դրության իրավական ռեժիմի մասին» ՀՀ օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթը և այն չընդունվեց:
Քվերակությունից առաջ «Լուսավոր Հայաստան» խմբակցության ղեկավար Էդմոն Մարուքյանը դիմելով իր ընդդիմադիր գործընկերներին՝ ասաց.
«Ես առաջարկում եմ «Բարգավաճ Հայաստան»-ի մեր գործընկերներին չմասնակցել այս քվեարկությանը, և նախագիծը չի ընդունվի»:
Նշենք, որ նշյալ նախագծին կողմ քվեարկեց միայն խորհրդարանական մեծամասնությունը՝ 65 կողմ ձայնով, իսկ ԼՀԿ-ն և ԲՀԿ-ն չմասնակցեցին քվեարկությանը, արդյունքում այն չընդունվեց:
Քվերակությունից հետո ի պատասխան Լ. Մակունցի՝ Է. Մարուքյանը հիշեցրեց, որ խորհրդարանական մեծամասնությունն ԱԺ-ում ունի 88 պատգամավոր և կարող էր պահանջել, որպեսզի նրանք բոլորը ներկա գտնվելով՝ մասնակցեին քվերակությանը և անցկացնեին նախագիծը, այլ ոչ թե իրենց մեղքը բարդեն ընդդիմության վրա.
«Բա աշխատավարձ եք ստանում, բա խի՞ չեք գալիս, հետևաբար ես ձեզ կոչ կանեմ չշահարկել որևէ քվեարկություն: Յուրաքանչյուր ուժ իր դիրքորոշումն ունի, ամենքն իր գործով է զբաղված»,- ասաց Մարուքյանը:
Հիշեցնենք, որ սույն օրենքների նախագծերի փաթեթով առաջարկվում էր հնարավորություն տալ պատկան մարմիններին համաճարակի հետևանքով առաջացած արտակարգ դրության ժամանակ մարդկանց անձնական տվյալների պաշտպանության, մասնավոր և ընտանեկան կյանքի անձեռնմխելիության, հաղորդակցության ազատության, գաղտնիության իրավունքներին միջամտություն իրականացնել, մասնավորապես, բացահայտել կորոնավիրուսով վարակված անձանց հետ հեռախոսով շփված կոնտակտավորների շրջանակը:
ՀԱՅԵՐԵՆ
Русский
English
Դաս. հայերեն
French
