Երեք արջերը շարունակում են տանջվել Սիսիանի Resort MJA հանգստյան գոտում․ բրիտանական «Daily mail»

07-07-2020 13:45:56   | Հայաստան  |  Մամլո հաղորդագրություն
 


Միջազգային մամուլը կրկին անդրադարձել է ՀՀ տարածքում անազատ պայմաններում պահվող գորշ արջերի խնդրին։ Բրիտանական «Daily mail» օրաթերթն այս անգամ գրել է ՀՀ Սյունիքի մարզի Սիսիան քաղաքի հարև
անությամբ Հացավան համայնքի տարածքում գտնվող «Resort MJA» հանգստյան գոտում անազատ պայմաններում պահվող կարմիրգրքյան երեք գորշ արջերի /Ursus arctos/ մասին։ Վայրի բնության և մշակութային արժեքների պահպանման հիմնադրամը (FPWC) պարբերաբար ահազանգեր է ստանում նշված համալիրում բանտարկված բեզոարյան այծերի /Capra aegagrus/ և գորշ արջերի մասին։ Արջերը որոնցից մեկն էգ է, երկուսը՝ արու։ Կենդանիները պահվում են փոքր, բետոնե հատակով վանդակներում, առանց անհրաժեշտ լայն ազատավանդակի։ Պայմանները տեսակի համար ոչ բարենպաստ են և բացարձակապես հարմարեցված չեն կենդանիների բնական կենսամիջավայրին։ Համալիրի տնօրենը նշել է, որ էգ արջը պարբերաբար ձագեր է ծնում, որոնց բաց են թողնում մոտակա անտառում։ Հայտնի փաստ է, որ անազատ պայմաններում ծնված կենդանիները չեն կարող ինքնուրույն գոյատևել վայրի բնության մեջ կամ կարող են մոտենալ բնակավայրերին և մարդկանց, ինչը մեծ ռիսկեր է պարունակում։ 
 
Արջերը կերակրվում են համալիրում առաջացած սննդային մնացորդներով, ինչը չի համապատասխանում նրանց բնական սննդակարգին։ Արու առանձնյակներից մեկի ատամները գտնվում են սարսափելի վիճակում, ինչը հավանաբար թե՛ սխալ սննդակարգի, թե՛ սթրեսի ազդեցությամբ վանդակների ճաղերը կրծոտելու հետևանք է։ Երեք կենդանիներն էլ դրսևորում են ստերեոտիպիկ վարք, ինչը վկայում է պահման սխալ պայմանների մասին։ Տեղանքում կազմակերպվում է նաև որս, ինչը ևս բացասական ազդեցություն է ունենում կենդանիների բնական գոյության վրա, քանի որ հրազենի կրակոցները արջերի համար լրացուցիչ սթրեսի աղբյուր են։ 
 
Ըստ համալիրի պատասխանատուի խոսքերի՝ «արջերին փրկել են գետից», ուստի  կենդանիները վերցված են վայրի բնությունից, ինչը «Կենդանական աշխարհի մասին» ՀՀ օրենքի խախտում է։ Վերջինս նշել է նաև, որ առկա չէ վայրի կենդանիներին անազատ կամ կիսաազատ
պայմաններում պահելու համար լիազոր մարմնի կողմից տրված անհրաժեշտ թույլտվություն։ 
 
Վայրի բնության և մշակութային արժեքների պահպանման հիմնադրամը (FPWC) իր գործընկեր Կենդանիների փրկության միջազգային կազմակերպության հետ միասին (IAR) իրականացվող Արջերի փրկության ծրագրի շրջանակներում պատրաստ է նոր՝ ավելի լավ պայմաններով ապաստարանում ընդունել այս երեք արջերին և կազմակերպել վերջիններիս համար պատշաճ մասնագիտական խնամք, սակայն «Resort MJA» տնօրինությունը հրաժարվում է նշված առաջարկից։ 
Հղում՝ https://www.dailymail.co.uk/news/article-8492027/Three-bears-face-suffering-Armenian-holiday-complex-animal-charitys-rescue-bid-fails.html 
 
 
 
 
Նոյյան տապան   -   Մամլո հաղորդագրություն
Լուրեր Հայաստանից եւ Սփյուռքից

Կարդացել են 260 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար