Արարատ Միրզոյանը կողմ չէ ՍԴ անդամների նշանակման կարգի մասին ՀՀ նախագահի առաջարկին. «Գործող մեխանիզմը բավականին հաջող է». ՀԺ
08-07-2020 15:35:20 | Հայաստան | Ի՞նչ է գրում մամուլը
Ազգային ժողովի նախագահ Արարատ Միրզոյանը այսօր ԱԺ-ում պատասխանեց լրագրողների հարցերին:
Անդրադառնալով Սահմանադրական դատարանի նախկին անդամների ՄԻԵԴ ներկայացրած գանգատին՝ Միրզոյանն ասաց, որ նրանք ունեին իրավունք դիմել եւ իրացրել են իրենց իրավունքը: ՄԻԵԴ-ը նրանց վերաբերյալ միջանկյալ որոշում կկայացնի, թե ոչ, Միրզոյանը դժվարացավ ասել:
Լրագրողները ԱԺ նախագահի կարծիքը հարցրին ՀՀ նախագահ Արմեն Սարգսյանի այն հայտարարության կապակցությամբ, թե երկու տարիների ընթացքում նախագահն առաջադրել է ՍԴ անդամի թեկնածուներ, որոնց այս կամ այն պատճառով մերժել են նախկին եւ ներկա Ազգային ժողովները: Այս համատեքստում նախագահն առաջարկել էր հնարավոր լուծման հետեւյալ տարբերակը՝ ՍԴ անդամներից երեքին նշանակի Հանրապետության նախագահը, երեքին՝ Բարձրագույն դատական խորհուրդը, երեքին էլ՝ Ազգային ժողովը:
Արարատ Միրզոյանը նախագահի հայտարարությունների կապակցությամբ նշեց. «Հանրապետության նախագահը երկու անգամ, եթե չեմ սխալվում, թեկնածու է առաջադրել, եւ Ազգային ժողովը չի ընտրել, եւ մեկ անգամ թեկնածու է առաջադրել, որ ԱԺ-ն ընտրել է: Գործող սահմանադրական կարգավորումներով դատարանակազմ մարմինները, այդ թվում եւ՝ նախագահը, թեկնածու են առաջադրում, ընտրությունը թողնված է Ազգային ժողովին, այսինքն՝ վարվել ենք այնպես, ինչպես նախատեսում է Սահմանադրությունը: Ցանկացած դատարանակազմ մարմնի առաջարկություն մենք էստեղ դիտարկում ենք, այնուհետեւ քվեարկությամբ համաձայնվում, կամ ոչ: Հիմա ինչը, որ առաջարկում է ՀՀ նախագահը, ենթադրում է նորից Սահմանադրության փոփոխություններ»: Արարատ Միրզոյանը նկատեց, որ այս պահին գործում է Սահմանադրության փոփոխությունների հանձնաժողով, եւ ՀՀ նախագահը իր առաջարկներով թերեւս բանավոր կամ գրավոր կերպով դիմի հանձնաժողովին:
Ինչ վերաբերում է ԱԺ լիազորություններից ՍԴ անդամի պաշտոնում առաջադրվող թեկնածուների ընտրության հարցը հանելուն եւ դատարանակազմական մարմիններին նրանց անմիջապես նշանակելու հնարավորություն տալուն, այս կապակցությամբ ԱԺ նախագահն ասաց. «Ես կարծում եմ՝ գործող մեխանիզմը բավականին հաջող է»: