«Politik.am» լրատվակայքը հրապարակել էր նյութ այն մասին, թե իբր ՀՀ վարչապետի աշխատակազմը Անկախության օրվա առթիվ մշակութային միջոցառումների կազմակերպման և սպասարկման համար 43 մլն դրամի գնման պայմանագիր է կնքել մի ընկերության հետ, որի մասին տեղեկություններ առկա չեն պետական համապատասխան հարթակներում։

 

Նյութի հեղինակը որոնում է կատարել ՀՀ էլեկտրոնային ռեգիստրում՝ «e-register.am»-ում, սակայն չկարողանալով գտնել որևէ տեղեկություն՝ եզրակացրել է՝ ընկերության մասին տեղեկություններ գտնելը անհնար է։

 

Իրականում թե՛ e-register.am, և թե՛ petekamutner.am պետական հարթակներում տեղեկությունները հասանելի են։

 

Ինչ վերաբերում է հոդվածագրի պնդմանը, թե ընկերության մասին տեղեկություն չկա նաև «tender-monitoring.am» կայքում, ապա հարկ ենք համարում նշել, որ սույն կայքը արտացոլում է պետական գնումների «Armeps» էլեկտրոնային հարթակում առկա տեղեկատվությունը։ Այստեղ առկա է հանրային գնումների օրենսդրությունը, պետական կառույցների գնումների պլանները, կնքված պայմանագրերը և այլն։

Հիշյալ երկու դեպքերում էլ նյութի հեղինակը, չկարողանալով գտնել իրեն անհրաժեշտ տեղեկատվությունը, կասկածի տակ է դրել դրանց գոյությունը։

 

Այսպես՝ «Armeps» էլեկտրոնային հարթակում տեսնում ենք, որ Վարչապետի աշխատակազմը 2020 թվականի սեպտեմբերի 16-ին մոտ 43 մլն դրամի գնման պայմանագիր է կնքել Արթուր Մանուկյան ԱՁ-ի հետ (ՀՎՀՀ 25440867)։ Առկա է ընկերության հասցեն, բանկային հաշիվը և այլն։

 

Պայմանագրով նախատեսված է ՀՀ անկախության օրվա առիթով մշակութային միջոցառումների կազմակերպման և սպասարկման ծառայությունների մատուցում՝

 

«Մեր ժամանակների հերոսը» ամենամյա մրցանակաբաշխության միջոցառման կազմակերպում, ստեղծագործական և ադմինիստրատիվ անձնակազմ, բանվորներ, հյուրընկալներ, միջոցառման կոնտենտի ստեղծում, դիզայներական աշխատանքներ, էկրաններին տեղադրվող վիդեոկոնտենտի ստեղծում, արտիստներ, նոր կատարումների նոտագրում, ռեկվիզիտներ, միջոցառման տպագրական ֆայլերի ստեղծում և տպագրություն, բեյջեր, մայկաներ, գլխարկներ, դիմակներ, արտիստների ելույթների բեմադրում և հագուստ, թվով 50 գովազդային վահանակների պատրաստում և տեղադրում, բիոզուգարանների վարձակալություն և սպասարկում, վրանների, սեղանների, աթոռների և այլ անհրաժեշտ պարագաների վարձակալություն, հանդիսատեսի անձրևանոցներ, անհրաժեշտ տեխնիկայի և թարգմանչական սարքերի վարձակալություն, թարգմանչի ծառայություն, դիմահարդարների և վարսահարդարների խումբ արտիստների համար, սցենարական աշխատանք, բացման պարային համարների բեմադրում և կոստյումներ, միջոցառման ետնաբեմի գլխավոր ձայն, հեռուստատեսային սայլակի վարձակալություն, ամբողջ անձնակազմի 4 օր աննդի և տրանսպորտի ապահովում դեպի Զվարթնոց և հակառակ ուղղությամբ։

 

Լրատվակայքի հաջորդ կեղծ պնդումն այն է, թե իբր Արթուր Մանուկյան Ա/Ձ-ն չունի գրանցված աշխատակիցներ: Այս պնդման համար նյութի հեղինակի համար հիմք է հանդիսացել Զինծառայողների ապահովագրության հիմնադրամի կայքում՝ «1000plus.am»-ում որոնումը։

 

 Այս դեպքում կարևոր է հասկանալ հարկային օրենսդրությունը։

 

«Տեղեկատվության ստուգման կենտրոնի» հարցմանն ի պատասխան՝ Զինծառայողների ապահովագրության հիմնադրամից հայտնեցին, որ անհատ ձեռներեցների պարագայում վճարումները կատարվում են տարեկան սկզբունքով, ընդ որում 2020 թվականի համար վճարումների վերջնաժամկետը սահմանված է հաջորդող տարվա ապրիլը։ Վճարումները կատարվում են Պետական եկամուտների կոմիտեում, ստուգումներ անցնելուց հետո նոր տեղեկատվությունը արտացոլվում է «1000plus.am» կայքում։

 

https://infocheck.am/am/posts/433

 

 

Նոյյան տապան  -   Ի՞նչ է գրում մամուլը