Բրիտանահայերը բողոքի ակցիա են անցկացրել BBC-ի դիմաց
19-10-2020 18:35:51 | Մեծ Բրիտանիա | Մամլո հաղորդագրություն
Բրիտանահայերը BBC մեդիաընկերության շենքի դիմաց բողոքի ակցիա են կազմակերպել «Ամոթ BBC-ին», «Ներկայացրեք ճշտմարտությունը», «Զեկուցեք, թե ինչ է կատարվում», «Զեկուցեք, որ նրանք ռմբակոծում են խաղաղ բնակավայրերը, եկեղեցիները» կոչերով։ Լոնդոնի հայ համայնքի ներկայացուցիչները հեռուստաընկերությունից պահանջել են ճիշտ լուսաբանել Արցախում տիրող իրավիճակը։
«Հավաքը հենց դրա դեմ էր, որ մենք չենք ուզում, որ BBC-ն բառախաղերով, վերնագրերի մեջ խույս տալով ներկայացնի իրականությունը, այլ ներկայացնի, որ սա միանշանակ ադրբեջանական ագրեսիա է, որ սա նրանց կողմից հրահրված պատերազմ է։ Մենք ձգտում ենք խնդիրը լուծել խաղաղության միջոցով»,- «Հայերն Այսօր»-ի հետ զրույցում ասել է Լոնդոնի հայ համայնքի ներկայացուցիչ Տիգրան Ալեքսանյանը։
Նրա խոսքով՝ ցույցին մասնակցել է 150-200 մարդ։ Ակցիան լուսաբանել են լրագրողներ։
«Մեր թիրախը հենց BBC-ի ունկնդիրն էր, այսինքն՝ երբ բրիտանական հասարակությունը լսում է, BBC-ն ընդունում է որպես ճշմարտության աղբյուր։ Այս միջոցառման շնորհիվ նրանք կսկսեն կասկածի տակ դնել, թե ինչպես է BBC-ն ներկայացնում: Այս առումով, կարելի է ասել, որ հաջողված ակցիա էր»,- նշել է Տիգրան Ալեքսանյանը։
Այս ցույցից հետո հայերը բողոքի ակցիա են անցկացրել Լոնդոնում գտնվող Թուրքիայի դեսպանատան մոտ։
ՀԱՅԵՐԵՆ
Русский
English
Դաս. հայերեն
French
