«Ուխտագնացություն դեպի Բեթհովեն» փառատոնի շրջանակում դեկտեմբերին կկազմակերպվեն սիմֆոնիկ և կամերային համերգներ
11-12-2020 13:14:28 | Հայաստան | Մշակույթ
Հայաստանի ազգային ֆիլհարմոնիկ նվագախմբի «Ուխտագնացություն դեպի Բեթհովեն» փառատոնի շրջանակում դեկտեմբերի ընթացքում կկայանա երկու սիմֆոնիկ և երկու կամերային համերգ։
Բեթհովենի ծննդյան օրը՝ դեկտեմբերի 16-ին, ժամը 19։00 Արամ Խաչատրյան համերգասրահում Հայաստանի ազգային ֆիլհարմոնիկ նվագախմբի կատարմամբ կհնչեն հանճարեղ կոմպոզիտորի թիվ 5 և թիվ 6 («Հովվերգական») սիմֆոնիաները։
Դեկտեմբերի 17-ին, ժամը 19։00 Արամ Խաչատրյան համերգասրահում ունկնդիրը հնարավորություն կունենա լսելու Բեթհովենի թիվ 1 և թիվ 4 սիմֆոնիաները։ Համերգները կղեկավարի գեղարվեստական ղեկավար և գլխավոր դիրիժոր Էդուարդ Թոփչյանը։ Նվագախումբը, պահպանելով հակահամաճարակային բոլոր կանոնները, այս ընթացքում ակտիվ փորձեր է իրականացրել և հավուր պատշաճի պատրաստվել բեթհովենյան հանճարեղ սիմֆոնիաների կատարմանը։
Բացի այդ, դեկտեմբերի ընթացքում կկազմակերպվեն կամերային համերգներ, որոնց ընթացքում հանդես կգան ՀԱՖՆ-ի մենակատարները։
Հիշեցնենք նաև, որ նվագախումբը դեկտեմբերին «Ուխտագնացություն դեպի Բեթհովեն» փառատոնի շրջանակում կձայնագրի և կտեսագրի հանճարեղ կոմպոզիտոր Լյուդվիգ վան Բեթհովենի առաջին հինգ սիմֆոնիաները։
Նշենք, որ այս ընթացքում կպատրաստվի և կցուցադրվի Բեթհովենին նվիրված վավերագրական ֆիլմաշար:
«Ուխտագնացություն դեպի Բեթհովեն» փառատոնը կազմակերպում է Հայաստանի ազգային ֆիլհարմոնիկ նվագախումբը՝ ՀՀ կրթության, գիտության, մշակույթի և սպորտի նախարարության աջակցությամբ: Փառատոնը հարգանքի տուրք է մատուցում հանճարեղ կոմպոզիտորի ժառանգությանը, որը կերտվել էր խավարի դեմ իր հավերժական պայքարի համատեքստում:
Հարցերի դեպքում կարող եք կապ հաստատել «Ուխտագնացություն դեպի Բեթհովեն» փառատոնի հասարակայնության հետ կապերի և մարքեթինգի բաժնի ղեկավար Ռոզա Գրիգորյանի հետ +374 77 30 34 84
ՀԱՅԵՐԵՆ
Русский
English
Դաս. հայերեն
French
