Կրթության և արվեստի ոլորտների վերաբերյալ հուշագրեր՝ ԿԳՄՍՆ-ի և Բրիտանական խորհրդի միջև

26-02-2021 12:38:31   | Հայաստան  |  Հասարակություն



 
ՀՀ կրթության, գիտության, մշակույթի և սպորտի նախարարության ու Բրիտանական խորհրդի միջև կնքվել է փոխըմբռնման հուշագիր՝ Բրիտանական խորհրդի անգլերենի և կրթության ծրագրի իրականացման շրջանակում համագործակցության վերաբերյալ: Հուշագիրը ստորագրել են ԿԳՄՍ նախարարի տեղակալ Արթուր Մարտիրոսյանը և Բրիտանական խորհրդի հայաստանյան մասնաճյուղի տնօրեն Արևիկ Սարիբեկյանը:
 
Համագործակցության նպատակն է համակարգել Բրիտանական խորհրդի կողմից իրականացվող անգլերենի և կրթական ծրագրերի մշակման ու իրականացման աշխատանքները, որոնք նպատակ ունեն նպաստել Հայաստանի կրթության բարեփոխումներին` խթանելով դասավանդման և ուսումնառության որակի բարձրացումը:
 
Հուշագրի շրջանակում նախատեսվում է ՀՀ պետական ​​դպրոցների շարունակական մասնագիտական ​​կողմնորոշման քաղաքականության և շրջանակի մշակում: Բացի դրանից՝ կողմերը կիրականացնեն «Ապագա անգլերեն. ճանապարհներ դեպի գերազանցություն» ծրագիրը, որի շրջանակում Բրիտանական խորհուրդը ֆինանսական աջակցություն կցուցաբերի 16 տարեկան երեխաների անգլերենի հմտությունները, անգլերենի ուսուցիչների լսարանային պրակտիկան
և վերաբերմունքը վերլուծելու, ինչպես նաև հասկանալու համար, թե երկրի լեզվական քաղաքականությունը որքանով է ազդում վերոգրյալի վրա: Բրիտանական խորհուրդը կստանձնի նաև «Ուսուցիչների վիրտուալ աշխատանքային խմբեր (vTAG)» անվանմամբ վիրտուալ ուսուցման համայնք ստեղծելու հանձնառությունը՝ աջակցելու անգլերենի ուսուցիչներին համախոհ մասնագետների հետ կապ հաստատելու, ինչպես նաև ռեսուրսների հասանելիություն և անհատականացված առցանց ուսուցման փորձ ունենալու գործընթացներին:
 
Հուշագրով նախատեսված հաջորդ կետը «Անգլերենի ազդեցությունը» ​​նախագիծն է, որի շրջանակում Բրիտանական խորհուրդը ֆինանսական աջակցություն կցուցաբերի Ավստրալիայի կրթության հետազոտությունների խորհրդի կողմից PISA մեթոդաբանության հիման վրա հետազոտության իրականացմանը:
 
«Կոդավորման հմտություններ. Կապակցենք ներկան ապագային» նախագծի շրջանակում Բրիտանական խորհուրդը 
Beeline-ի ֆինանսական օժանդակության միջոցով կփորձարկի մի ծրագիր, որի նպատակն է կոդավորման հմտություններ դասավանդել երեք ավագ դպրոցների աշակերտներին և զարգացնել քննադատական ​​մտածողության, որոշումների կայացման, խնդիրների լուծման, ստեղծագործականության և համագործակցության հիմնարար հմտությունները:
 
Նշված գործընթացներում նախարարությունը հանձնառություն է ստանձնել աջակցել Բրիտանական խորհրդին՝ համապատասխան աշխատակիցների տրամադրման, պիլոտային ավագ դպրոցների ընտրության, ծրագրերի կայունության ապահովման և հետպիլոտային փուլի ընդլայնման և այլ ուղղություններով:
 
ԿԳՄՍ նախարարությունը և Բրիտանական խորհրդի միջև կնքվել է նաև մեկ այլ փոխըմբռնման հուշագիր՝ «Ստեղծագործական արդյունաբերության քաղաքականության երկխոսություն» ծրագրի շրջանակում համագործակցության վերաբերյալ: Ըստ այդմ՝ Բրիտանական խորհուրդը կտրամադրի խորհրդատու, որը մշակութային ռազմավարություն մշակելու գործում կաջակցի ԿԳՄՍ նախարարությանը՝ հիմնվելով ՀՀ կառավարության, Բրիտանական խորհրդի և այլ գործընկերների կողմից արդեն
իսկ ձեռնարկված աշխատանքների վրա: Ծրագրի արդյունքում ակնկալվում է մշակել մշակութային ռազմավարության նախագիծ՝ սահմանելով տեսլականը, հիմնական նպատակներն ու արդյունքները, ինչպես նաև արվեստի և մշակույթի ոլորտում ՀՀ կառավարության հիմնական ուղղությունները: Նախատեսվում է նաև Կառավարության գործողությունների ծրագրի վերաբերյալ առաջարկությունների ներկայացում` ռազմավարության հիմնական ուղղություններին համապատասխանեցնելու համար, միջնաժամկետ ճգնաժամի կառավարման ծրագրի/ռազմավարության նախագծի ստեղծում՝ որպես հիմնական ռազմավարության հավելված, ինչպես նաև ժամանակակից արվեստի ոլորտում չափելի որակական արդյունքային ցուցանիշների սահմանում՝ միջազգային փորձի հիման վրա:
Նոյյան տապան   -   Հասարակություն
Լուրեր Հայաստանից եւ Սփյուռքից


Կարդացել են 99 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար