Երևան, 15 ապրիլի, «Կասպերսկի» ընկերության Հայաստանի ներկայացուցչություն։ Չարագործները 2021-ի սկզբին մի շարք գրոհներ են իրականացրել՝ օգտագործելով Cring ծածկագրիչը։ Գրոհի ենթարկված ձեռնարկություններից մեկում Kaspersky ICS CERT-ի փորձագետների կողմից միջադեպի հետաքննությունը պարզել է, որ Cring ծածկագրիչի գրոհներում օգտագործվում է VPN-սերվերների խոցելիությունը: Զոհերի թվում են Եվրոպայի երկրներում գործող արդյունաբերական ձեռնարկությունները։ Եվ առնվազն մեկ դեպքում ծածկագրիչի գրոհը հանգեցրել է մի միջազգային արդյունաբերական հոլդինգի երկու իտալական գործարաններում արտադրության ժամանակավոր դադարեցմանը, որի գլխամասը գտնվում է Գերմանիայում։

 

Cring ծածկագրիչով գրոհների շարքի ժամանակ չարագործները շահագործել են CVE-2018-13379 խոցելիությունը Fortigate VPN-սերվերներում՝ ձեռնարկության ցանցին նախնական հասանելիություն ստանալու համար։ Խոցելիությունը թույլ է տալիս չարագործին առանց իրավազորման միանալ սարքին և հեռավար հասանելիություն ստանալ սեանսի ֆայլին, որը պարունակում է օգտատիրոջ անունը և գաղտնաբառը բաց տեսքով։ Խնդիրը արտադրողի կողմից շտկվել է 2019 թվականին, սակայն մինչ օրս ոչ բոլոր սարքատերերն են դրանք թարմացրել։ 2020-ի աշնանը դարկվեբի ֆորումներում սկսեցին հայտնվել խոցելի սարքերի IP-հասցեների բազայի գնման առաջարկներ:

 

Հետաքննության ընթացքում պարզվել է, որ հարձակման օրը, հասանելիություն ստանալով կորպորատիվ ցանցի առաջին համակարգին, Cring-ի օպերատորներն օգտագործել են Mimikatz ուտիլիտը Windows-ի օգտատերերի այն հաշիվները գողանալու համար, որոնք նախկինում մուտք են գործել սկզբնապես կոտրված համակարգիչ։ Դրա օգնությամբ չարագործներին բախտ է վիճակվել անմիջապես գողանալ դոմենային ադմինիստրատորի հաշվառման տվյալները։ Ոչ տևական հետախուզումից հետո չարագործներն ընտրել են մի քանի համակարգեր, որոնք կարևոր են համարել արդյունաբերական ձեռնարկության գործունեության համար, և անմիջապես ներբեռնել և դրանց վրա գործարկել Cring ծածկագրիչը։

 

Համակարգը Cring ծածկագրիչից պաշտպանելու համար փորձագետները խորհուրդ են տալիս անընդհատ թարմացնել VPN-շլյուզի ծրագիրը և վերջնական կետերի և դրանց տվյալների բազաների պաշտպանության լուծումները մինչև վերջին տարբերակները; համոզվել, որ Active Directory-ի քաղաքականությունները թույլ են տալիս օգտատերերին մուտք գործել միայն այն համակարգեր, որոնց հասանելիությունը պայմանավորված է աշխատանքային անհրաժեշտությամբ; սահմանափակել VPN-ի հասանելիությունը օբյեկտների միջև և փակել բոլոր պորտերը, որոնց աշխատանքը չի պահանջվում տեխնոլոգիական գործընթացի իրականացման համար; դիտարկել Endpoint Detection and Response դասի պաշտպանական լուծումների ներդրման հնարավորությունն ինչպես կորպորատիվ, այնպես էլ արդյունաբերական ցանցում; հարմարեցնել Managed Detection and Response դասի ծառայությունները՝ կիբեռանվտանգության փորձագետների բարձրակարգ գիտելիքներին և մշակումներին օպերատիվ հասանելիություն ստանալու համար; օգտագործել հատուկ պաշտպանություն արդյունաբերական գործընթացների համար:

 

Հետաքննության մասին ավելի մանրամասն տեղեկատվությունը հասանելի է Kaspersky ICS CERT-ի կայքում:

 

 

Նոյյան տապան  -   Մամլո հաղորդագրություն