«Չգիտեմ՝ ուրա՞խ եմ, թե՞ տխուր. ինչո՞ւ, որովհետև 80 տարեկան եմ». Ռոբերտ Էլիբեկյան
21-04-2021 19:09:53 | Հայաստան | Մամլո հաղորդագրություն
Ապրիլի 21-ը ՀՀ ժողովրդական նկարիչ, Հայաստանի նկարիչների միության անդամ Ռոբերտ Էլիբեկյանի ծննդյան օրն է. այսօր լրացավ Վարպետի 80-ամյակը:
Հոբելյանական օրվա կապակցությամբ ՀՀ ԿԳՄՍ նախարարի տեղակալ Արա Խզմալյանը և Նկարիչների միության նախագահ Սուրեն Սաֆարյանն այցելել են մեծանուն գեղանկարչին, տեղեկանում ենք ԿԳՄՍ նախարարությունից։
Շնորհավորելով 80-ամյա հոբելյանի առթիվ՝ նախարարի տեղակալ Արա Խզմալյանը նրան է փոխանցել նախարար Վահրամ Դումանյանի շնորհավորական ուղերձը:
«Հարգելի՛ պարոն Էլիբեկյան: Անհնար է պատկերացնել արդի հայ կերպարվեստն առանց Ձեր ավանդի, որի ինքնատիպությունն ու ինքնուրույնությունը հաստատվել են վաղուց: Ձեր արվեստն իր արժևորումն է ստացել ոչ միայն հայրենի գեղանկարչության և արվեստագիտական մտքի համատեքստում, այլև ճանաչելի է միջազգային արվեստասեր հասարակության շրջանում»,- նշել է Վահրամ Դումանյանը՝ մաղթելով Վարպետին անսպառ ստեղծագործական ներշնչումներ, լավատեսություն, բեղուն և երկար տարիների կյանք:
Նկարիչների միության նախագահ Սուրեն Սաֆարյանը նույնպես շնորհավորել է Վարպետին՝ մաղթելով քաջառողջություն, ստեղծագործական նորանոր նվաճումներ և ամենայն բարիք:
«Դուք հանդիսանում եք Էլիբեկյան մշակութային տոհմի նկարչական ավանդույթների շարունակողը և հայ կերպարվեստի կարկառուն վարպետներից մեկը: Ձեր ստեղծագործություններն իրենց հաստատուն տեղն են զբաղեցնում հայ կերպարվեստում՝ հարստացնելով ինչպես Հայաստանի, այնպես էլ արտերկրի բազմաթիվ հեղինակավոր թանգարանների և պատկերասրահների հավաքածուները»,- փաստել է ՀՆՄ նախագահը:
Ռոբերտ Էլիբեկյանը շնորհակալություն է հայտնել շնորհավորանքների համար և ավելացրել. «Չգիտեմ՝ այսօր ուրա՞խ եմ, թե՞ տխուր. ինչո՞ւ, որովհետև 80 տարեկան եմ: Բայց իմ բախտը հաստատ բերել է. ունեմ հրաշալի ընտանիք, հրաշալի որդիներ»:
Հոբելյանական շնորհավորանքները համեմվեցին նաև Ռոբերտ Էլիբեկյանի տիկնոջ և մուսայի՝ տիկին Մարիի հիշողություններով, վարպետի կյանքի ու ստեղծագործական գործունեության գեղեցիկ պատմություններով:
Ռոբերտ Էլիբեկյանը ծնվել է 1941 թվականի ապրիլի 21-ին Թբիլիսիում: 1960-65 թվականներին սովորել է Երևանի գեղարվեստաթատերական ինստիտուտում: 1966 թ․-ին Հայաստանի ճարտարապետների տանը բացվել է «Ռոբերտ Էլիբեկյան և Սեյրան Խաթլամաջյան» առաջին անհատական ցուցահանդեսը (բացումը կատարել է Մարտիրոս Սարյանը):
1970 թվականից Հայաստանի նկարիչների միության անդամ է:
Ռոբերտ Էլիբեկյանը բազմաթիվ անհատական և խմբային ցուցադրություններ է ունեցել Հայաստանում և արտերկրում։ Ստեղծագործությունները ներկայացվել են մի շարք թանգարաններում և խոշոր հավաքածուներում՝ Հայաստանի ազգային պատկերասրահ, Երևանի ժամանակակից արվեստի թանգարան, ՀՀ կառավարության տուն, նախագահի նստավայր, Մատենադարան. Մ. Մաշտոցի անվան հին ձեռագրերի ինստիտուտ, Երևանի պատմության, Մայր Աթոռ Սուրբ Էջմիածնի, Մոսկվայի արևելյան արվեստի, Դեթրոյթի «Ալեք և Մարի Մանուկյան», Նյու Ջերսիի Զիմերլի, Վենետիկի Մխիթարյան միաբանության թանգարաններ, Մոսկվայի Տրետյակովյան պատկերասրահ, Սպիտակ տան, Ելիսեյան պալատի հավաքածուներ և այլուր:
Ռոբերտ Էլիբեկյանը Հայաստանում և արտերկրում բազմաթիվ թատերական ձևավորումների հեղինակ է։ Որպես նկարիչ մասնակցել է «Հայֆիլմ» կինոստուդիայի «Խաթաբալա», «Հայկական որմնանկարներ» ֆիլմերի էկրանավորմանը:
2014 թվականին լույս է տեսել Ռոբերտ Էլիբեկյանի գիրք-ալբոմը, որը ներկայացնում է նկարչի ստեղծագործական կենսագրությունը։ Նա, մերժելով պարտադրված կարծրատիպերը, ստեղծում է իր աշխարհը՝ անիրական, պարուրված գույների անօրինակ համադրությամբ ու եթերային լույսով: Գրքում ներկայացված են նաև նրա տարբեր ժանրերի գործերը, հիշողություններն ու մտորումները տիեզերական նշանների, կյանքի, արվեստի ու ժամանակի մասին, ինչպես նաև ժամանակակիցների կարծիքները նրա արվեստի մասին:
«Դուք փորձե՞լ եք մտնել Ռոբերտ Էլիբեկյանի կտավների մեջ, տեղավորվել նրա ստեղծած իրականությունում... ոչ թե դիտել, ոչ թե մակերեսը գնահատել, այլ ապրել նրանց մեջ: Եվ դուք Ձեզ կզգաք այն երկրում, որը շարունակաբար կրում եք Ձեր մեջ երկչոտ համեստությամբ։ Էլիբեկյանը ինձ ևս հնարավորություն է տալիս ապրել իր ստեղծած աշխարհում, որը մեր խորքերում պահված հարազատ միջավայրն է, մտնել նրա փողոցները, զրուցել նրա ասպետների հետ, ուրախանալ նրա ժպիտների զվարճանքով, մտնել նրա դիցուհիների շուրջպարի մեջ, շնչել նրա թափանցիկ օդը, պերճանալ նրա գունագեղությամբ, ապրել նրա Հայաստանում»,- Ռ. Էլիբեկյանի ստեղծած իրականության ու աշխարհի մասին ասել է Աղասի Այվազյանը:
ՀԱՅԵՐԵՆ
Русский
English
Դաս. հայերեն
French
