Առանց պատշաճ բուժզննություն անցնելու` զորակոչիկը ճանաչվել էր պիտանի զինծառայության համար՝ սահմանափակումով. ՀՔԱՎ
12-05-2021 13:14:26 | Հայաստան | Մամլո հաղորդագրություն
Չնայած առողջական լուրջ խնդիրներին` զորակոչիկը ճանաչվել էր սահմանափակումով պիտանի զինծառայության համար։ Պաշտպանության նախարարությանը հասցեագրված ՀՔԱՎ-ի գրություններից հետո կրկին իրականացվեց բժշկական հետազոտություն, որի արդյունքների հիման վրա ճանաչվեց ոչ պիտանի զինծառայությանը։
Այս մասին տեղեկանում ենք Հելսինկյան Քաղաքացիական Ասամբլեայի Վանաձորի գրասենյակի տարածած հաղորդագրությունից:
2020 թ. օգոստոսի 25-ին ՀՔԱ Վանաձորի գրասենյակ էր դիմել զորակոչիկ Ա. Ե.-ն՝ իր իրավունքների պաշտպանության հարցով:
Դեռևս 2017 թ.-ի ամառային զորակոչին Ա. Ե.-ն ստացել է տարկետում՝ 3 տարի ժամկետով՝ ունենալով ողերի սեպաձև դեֆորմացիա, կրծքային հատվածի սկոլիոզ, զարկերակային բարձր ճնշում և այլ առողջական խնդիրներ։
Տարկետման ժամկետը լրանալուն պես՝ 2020 թ.-ի ամառային զորակոչի ժամանակ, Լոռու մարզի տարածքային ստորաբաժանման բժշկական հանձնաժողովի կողմից ուղեգրվել է առողջական վիճակի հետազոտության «Էրեբունի» ԲԿ, այնուհետև կենտրոնական բժշկական հանձնաժողովի կողմից ստուգիչ հետազոտման՝ «Նատալի-Ֆարմ» ՍՊԸ, որի արդյուքնում ախտորոշվել է «Ողնաշարի գոտկային 2-րդ ողի մարմնի աննշան սեպաձև դեֆորմացիա, կրծքային կիֆոզի հարթեցում, կրծքագոտկային հատվածի սկոլիոզ 1-ին աստիճանի ֆունկցիայի աննշան խանգարում», որի արդյուքնում 2020 թ. ամառային զորակոչին ճանաչվել է սահմանափակումով պիտանի զինվորական ծառայության համար՝ ՀՀ Կառավարության 404 որոշման 36-րդ հոդվածի Գ կետի։
Չհամաձայնելով առողջական վիճակի հետազոտությունների արդյունքների և ԿԲՀ եզրակացության հետ՝ Ա.Ե.-ն սեփական նախաձեռնությամբ անցել է ողնաշարի ՄՌՏ հետազոտություն. պարզվել է, որ առողջական վիճակը ոչ միայն չի բարելավվել, այլ վատթարացել է:
ՀԱՅԵՐԵՆ
Русский
English
Դաս. հայերեն
French
