ՀայՓոստի վերաբրենդավորված առաջին բաժանմունքները՝ Երևանում
17-06-2021 18:38:43 | Հայաստան | Մամլո հաղորդագրություն
ՀայՓոստ ընկերությունը վերաբրենդավորման գործընթացի նոր փուլով իրականացնում է մասնաճյուղերի վերապրոֆիլավորման, վերանորոգման և վերաբրենդավորման գործընթացը Երևան քաղաքում:
Ինչպես տեղեկանում ենք ՀայՓոստ ՓԲԸ-ից, հունիսի 17-ին Երևանում բացվեց երկու փոստային բաժանմունք. փոստային դասիչ՝ 0028, հասցե՝ Կիևյան 4, և 0019, հասցե՝ Բաղրամյան 23: ՀայՓոստի բաժանմունքներն ունեն մի շարք նորարարություններ.
•հերթերի կարգավորման էլեկտրոնային համակարգ,
•օնլայն հերթագրման Earlyone համակարգ,
•բջջային հեռախոսների և աքսեսուարների վաճառք,
•Wi-Fi հասանելիություն,
•հանդերձարան, որտեղ հաճախորդը կարող է փորձել առցանց պատվիրված իրերը:
Ինչպես նշեց ՀայՓոստ ընկերության գլխավոր տնօրեն Հայկ Կարապետյանը.- «ՀայՓոստը կառուցվող մեծ էկոհամակարգ է և հոլդինգ՝ իր լոգիստիկ և ֆինանսական ծառայություններով, նորարար և տեխնոլոգիական լուծումներով: ՀայՓոստի վերաբրենդավորման առաջին փուլով մեկնարկում ենք Երևան քաղաքում փոստային բաժանմունքների վերապրոֆիլավորման և վերաբրենդավորման գործընթացը: Մեր նորաբաց բաժանմունքները տեխնիկապես հագեցված և ժամանակակից ստանդարտներին համապատասխան են: Մինչև տարեվերջ մեր քաղաքացիները կտեսնեն նոր, ժամանակակից փոստային բաժանմունքներ Երևան քաղաքում, այնուհետև՝ ՀՀ մարզերում»:
Փոստային բաժանմունքերի ցանցի տնօրեն Կարեն Մկրտումյանը նշեց.- «ՀայՓոստը վերափոխման ճանապարհին է, և զարգացման ռազմավարությունով նպատակ ունենք սկիզբ դնել նոր ծառայությունների, սպասարկման նոր ստանդարտների և առաջադեմ լուծումների մատուցմանը: ՀայՓոստն ունի ՀՀ-ում ամենամեծ ցանցը, որը հաճախորդի համար կդառնա առավել հարմարավետ, նորարար և տեխնիկապես հագեցված»:
ՀայՓոստի տեսլականն է. որպես Հայաստանի փոստային կապի ազգային օպերատոր դառնալ Հայաստանի Հանրապետությունում և տարածաշրջանում հուսալի և ժամանակակից փոստային, լոգիստիկ, ֆինանսական և պետական ծառայությունների մատուցման միասնական հարթակ:
ՀԱՅԵՐԵՆ
Русский
English
Դաս. հայերեն
French
