Մատենադարանում այսօր տեղի է ունեցել Հայաստանի ֆրանսերեն դասավանդողների համաժողովը: Ինչպես տեղեկանում ենք ԿԳՄՍ նախարարությունից, համաժողովը կազմակերպել էր ՀՀ-ում Ֆրանսիայի դեսպանատունը՝ Հայաստանի ֆրանսերեն դասավանդողների ասոցիացիայի հետ համագործակցությամբ: Միջոցառումը համախմբել էր ՀՀ հանրակրթական ուսումնական հաստատությունների շուրջ 100 ֆրանսերեն դասավանդողների: 

 

Համաժողովի մասնակիցներին ողջունել է ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանը՝ ընդգծելով կրթության ոլորտում հայ-ֆրանսիական կապերը և ՀՀ-ում Ֆրանսիայի դեսպանատան հետ իրականացվող համատեղ ծրագրերը՝ մասնավորապես ֆրանսերենի խորացված ուսուցման ծրագրերի ընդլայնման և կրթության շարունակականության ապահովման տեսանկյունից: 

 

Փոխնախարարն անդրադարձել է իրականացվող պետական քաղաքականությանը, որը նոր հնարավորություններ է ստեղծում ֆրանսերենի ուսուցման ընդլայնման և դրա որակի բարձրացման, ինչպես նաև ֆրանսերենի ուսուցիչների մասնագիտական զարգացման առումով: Նրա խոսքով՝ հանրակրթության պետական նոր չափորոշիչը հնարավորություն է տալիս էապես բարձրացնելու օտար լեզուների ուսուցման որակը՝ հիմնվելով կոմպետենցիոն ուսուցման վրա: 

 

«Օտար լեզուների ուսուցման դաշտը հենց այն բնագավառն է, որտեղ առավելապես տեսնում ենք տարբեր բաղադրիչների միաձուլումը և նոր հնարավորությունների ընձեռումը: Կոմպետենցիոն մոտեցման համատեքստում հանրակրթության պետական չափորոշիչը լեզվական գրագիտությունը սահմանում է որպես երեխայի առանցքային կարողունակություն, որի արդյունքում աշակերտները պետք է բանավոր ու գրավոր գրագետ հաղորդակցվեն ոչ միայն մայրենի, այլև օտար լեզուներով: Նրանք պետք է կարողանան լեզուն օգտագործել որպես ուսումնառության և հասարակական կյանքի մասնակցության համապիտանի գործիք: Լեզուն է այն հիմքը, որով ձևավորվում է մտածողությունը»,- նշել է Ժաննա Անդրեասյանը:

 

Նա կարևորել է այն իրողությունը, որ լեզվի ուսուցումը դիտարկվի որպես միջմշակութային հնարավորություն: Ըստ նախարարի տեղակալի՝ խնդիր է դրվում ունենալ առնվազն երկու օտար լեզվով որակյալ ուսուցման հնարավորություն, մասնավորապես՝ լեզուների իմացության եվրոպական շրջանակի B2 մակարդակի ապահովում 12-ամյա կրթության, իսկ B1-ի ապահովում՝ հիմնական կրթության ավարտին: Փոխնախարարի խոսքով՝ այս պարագայում խորացված ուսուցման դպրոցները կարող են հանդես գալ որպես պոտենցիալ ռեսուրս կենտրոններ հանրապետության մյուս դպրոցների համար՝ օգտագործելով դրանց փորձառությունն ու հնարավորությունները:  

Ժաննա Անդրեասյանը կարևորել է նաև ուսուցիչների մասնագիտական պատշաճ զարգացումը: Այդ համատեքստում նա ուրախությամբ փաստել է, որ «Ալիաս ֆրանսեզ» կազմակերպությունը երաշխավորվել է որպես ատեստավորման ենթակա ուսուցիչներ վերապատրաստող կառույց: Նախարարի տեղակալի խոսքով՝ խորացված ուսուցմամբ դպրոցները ևս կարող են հանդես գալ նմանօրինակ նախաձեռնությամբ: Ժաննա Անդրեասյանը նաև կարևորել է հանրակրթության բարելավման գործընթացում օգտագործվող գործիքները, մասնավորապես՝ նախագծային ուսուցումը:

 

«Lեզուն երբեք միայն լեզվի ուսուցում չէ. հանրակրթության պետական չափորոշիչը, ըստ էության, պարտադիր է դարձնում նախագծային ուսուցումը՝ որպես մեթոդ: Այն հնարավորություն է տալիս իրականացնելու միջառարկայական նախագծեր, որոնք կկապեն տարբեր առարկաներից ստացված գիտելիքներն ու հմտությունները: Մենք կարող ենք ունենալ հրաշալի նախագծեր, որոնք կկապեն լեզուն ու պատմությունը, լեզուն ու գրականությունը, լեզուն ու արվեստը: Սա ուսուցիչներին  թույլ կտա ստեղծագործական նոր ասպարեզ բացել: Վստահ եմ, որ այս ճանապարհը կանցնենք միասին, որովհետև առանց ուսուցիչների ներգրավման հանրակրթության փոփոխություններն ուղղակի անհնար կլինեն: Վստահ եմ, որ այդ ճանապարհին կունենանք մեր լավ գործընկերների աջակցությունը»,- ասել է Ժաննա Անդրեասյանը և հավաստիացրել, որ նախարարությունն անելու է հնարավորը, որպեսզի ուսուցիչների մասնագիտական զարգացումը և հանրակրթության որակական փոփոխություններն օր առաջ կյանքի կոչվեն: 

Միջոցառման մասնակիցներին ողջունել են նաև ՀՀ-ում Ֆրանսիայի Հանրապետության արտակարգ և լիազոր դեսպան Ժոնաթան Լաքոտը և Մատենադարանի տնօրեն Վահան Տեր-Ղևոնդյանը:

 

Համաժողովի ընթացքում հնչել են տարբեր ելույթներ, որոնցում անդրադարձ է եղել ֆրանսերենի դասավանդման զարգացմանը, լեզուների ուսուցման նոր չափորոշիչներին, ֆրանսերենի խորացված ուսուցման հեռանկարներին ու մարտահրավերներին և այլն: 

 

 

 

 

 

Նոյյան տապան  -   Մամլո հաղորդագրություն