«Սփյուռքի երիտասարդ դեսպան» ծրագրին դիմելու վերջնաժամկետը երկարաձգվել է
25-06-2021 19:56:44 | Հայաստան | Մամլո հաղորդագրություն
ՀՀ սփյուռքի գործերի գլխավոր հանձնակատարի գրասենյակն ուրախ է տեղեկացնել, որ «Սփյուռքի երիտասարդ դեսպան» ծրագրին դիմելու վերջնաժամկետը երկարաձգվում է մինչ հուլիսի 5-ը: Ծրագիրն իրականացվում է «Ջինիշյան» հիշատակի հիմնադրամի հովանավարությամբ և նպատակ ունի ձևավորել հայ երիտասարդների դինամիկ ցանց, որի մասնակիցները կդառնան հայրենիքի ներկայացուցիչներն իրենց համայնքներում: Այս մասին տեղեկանում ենք ՀՀ սփյուռքի գործերի գլխավոր հանձնակատարի գրասենյակից:
Ծրագրին կմասնակցեն 25 սփյուռքահայ երիտասարդներ, այն կտևի 1 տարի, որից 2 շաբաթը մասնակիցները ֆիզիկապես կլինեն Հայաստանում:
Ծրագիրն ունի տեսական և գործնական բնույթ, ինչպես նաև նախատեսվում են տարաբնույթ այցեր և հանդիպումներ: Ծրագրի ավարտին կկազմակերպվի Երիտասարդական ֆորում, որի ընթացքում կպատրաստվի երիտասարդական քաղաքականության փաստաթուղթ՝ սփյուռքի համայնքների և հայրենիքի միջև կայուն համագործակցություն ձևավորելու համար:
Ծրագրի դիմորդները կարող են լինել 22-35 տարեկան սփյուռքահայ այն երիտասարդները, ովքեր առնվազն 5 տարի բնակվում են սփյուռքում, սփյուռքի հայկական համայնքների ակտիվ և ներկայացուցչական անդամներ են, տիրապետում են հայերենին, ցանկություն ունեն ներդրում ունենալու Հայաստանի շահերն առաջ տանելու, ինչպես նաև Հայաստան-սփյուռք հարաբերություններն ամրապնդելու գործում, ունեն մեդիա կոնտենտ գրելու փորձառություն (ցանկալի է)։
Հայտադիմումները կընդունվեն մինչ հուլիսի 5-ը:
Հայտը լրացնելու և ավելի մանրամասն տեղեկատվության համար այցելեք հղմամբ՝ http://diaspora.gov.am/hy/programs/19/Diaspora-Youth-Ambassador:
ՀՀ սփյուռքի գործերի գլխավոր հանձնակատարի գրասենյակի մասին
Հիմնվելով 2019 թվականին՝ ՀՀ սփյուռքի գործերի գլխավոր հանձնակատարի գրասենյակը պատասխանատու է Հայաստան-սփյուռք հարաբերությունների զարգացման և իրականացման ռազմավարությունների և քաղաքականության մշակման համար: Այն ներառում է հայրենադարձության գործընթացի աջակցությունն ու խրախուսումը, հայրենադարձների ինտեգրման գործընթացի հեշտացումը, սփյուռքի ներուժի քարտեզագրումը և այլն: Գրասենյակը բաղկացած է տարբեր ստորաբաժանումներից, որոնցում ներգրավված են ներկայացուցիչներ սփյուռքի հայ համայնքներից: Ընթացիկ գործունեության և ծրագրերի մասին ավելի իմանալու համար այցելեք գրասենյակի կայք՝ http://diaspora.gov.am/hy, հետևեք մեզ սոցցանցերում՝ @DiasporaGovAm կամ գրեք diaspora@gov.am էլ. հասցեով:
ՀԱՅԵՐԵՆ
Русский
English
Դաս. հայերեն
French
