«Ալցհայմերի խնամք Հայաստան» կազմակերպությունը «Էքսպեր Թեքնոլոջիս» ընկերության հետ համագործակցությամբ Նորքի տուն-ինտերնատում իրականացնում է Հայաստանի խնամքի տներում ապրող տարեցների կյանքի որակը ռոբոտի օգնությամբ բարելավելու ծրագիրը: Նախագիծն իրականացվում է ՀՀ աշխատանքի և սոցիալական հարցերի նախարարության աջակցությամբ և «Հ.Հովնանյան ընտանիք» հիմնադրամի ֆինանսավորմամբ:

 

Մայիսի 25-ին մեկնարկած ծրագրի տևողությունը 12 շաբաթ է, տուն-ինտերնատի 20 մասնակիցներից յուրաքանչյուրը Ռոբին ռոբոտի հետ մոտ կես ժամ տևողությամբ շաբաթական երկու հանդիպում է ունենում: Շահառուների հետ Ռոբինը շփվում և զրուցում է՝ հաշվի առնելով նրանց ինտելեկտուալ մակարդակը, հետաքրքրությունների շրջանակն ու նախասիրությունները: Ռոբինի հետ շփումն ուղեկցվում է նաև ինտելեկտուալ խաղերով, տարեցների նախընտրած երաժշության ունկնդրմամբ, սիրված ֆիլմերից հարցախույզերով, գրականության ու արվեստի մասին ու եղանակի շուրջ զրույցներով: 

 

Ծրագրի ընթացքին հետևելու հուլիսին Երևան են ժամանել նախագծի հեղինակ, «Ալցհայմերի խնամք Հայաստան» կազմակերպության հիմնադիր, ծերաբույժ Ջեյն Մահակյանը և «Հ.Հովնանյան ընտանիք» հիմնադրամի ներկայացուցիչներ Լինդա Եփոյանը և Նառա Մելիքյանը։ Նրանք շրջել են հաստատությունում, ներկա եղել Ռոբին ռոբոտի հետ Նորքի բնակիչների հանդիպմանն ու շփմանը:

 

«Այս աննախադեպ նախագիծն արդեն ցույց է տալիս, թե բուժման նորարարական եղանակները, ինչպիսին ռոբոտի միջամտությունն է, որքան արդյունավետ են տարեցների և նեյրոդեգեներատիվ խնդիրներ ունեցող մարդկանց կյանքում դրական փոփոխություն մտցնելու գործում:

 

Ռոբին ռոբոտը մեծ հավանության է արժանացել հետազոտության բոլոր մասնակիցների կողմից: Իսկապես տպավորված եմ, երբ տեսնում եմ, որ հետազոտության ընթացքում դեպրեսիայի և անհանգստության զգացումներն ավելի քիչ են դրսևորվում, և նկատելի է ճանաչողության բարելավում»,-ասել է բժիշկ Ջ.Մահակյանը՝ Կորոնավիրուսի ճգնաժամի հետևանքներն ազդեցություն են ունենում առանց այն էլ խոցելի տարեց բնակչության ու հատկապես այն անձանց վրա, ովքեր ապրում են խնամքի հաստատություններում: Համավարակով պայմանավորված մեկուսացումը բացասաբար է ազդում բնակիչների ֆիզիկական զգացողությունների, մտավոր կարողությունների և իմացական գործընթացների վրա: 

 

«Շատ ուրախ ենք տեսնել, որ այս կարճ ժամանակահատվածում Ռոբինը կարողացել է Նորքի տուն-ինտերնատի բնակիչների հոգեվիճակի ու ճանաչողական գործընթացների վրա դրական ազդեցություն ունենալ: Հաշվի առնելով ապացույցների վրա հիմնված միջամտությունները՝ մենք արդեն կարող ենք տեսնել տարեցների շրջանում բարելավված ճանաչողական ունակություններ, դեպրեսիայի դրսևորումների նվազման միտումներ, քնի կարգավորման առումով դրական տեղաշարժեր, և, իհարկե, կյանքի որակի բարձրացում»,-նշել է «Էքսպեր Թեքնոլոջիս» ընկերության գործադիր տնօրեն և հիմնադիր Կարեն Խաչիկյանը:

 

Հատկանշական է, որ ծրագիրն իրականացվում է բացառապես կամավորության սկզբունքով: Ծրագրի ավարտից հետո հաջորդող 9 ամիսների ընթացքում Ռոբինը կհյուրընկալվի Հայաստանում գտնվող խնամքի մյուս հաստատություններում: 

 

Ալցհայմերի խնամք Հայաստանի մասին

 

Կազմակերպությունը հիմնադրել է 2017 թվականին ծերաբույժ Ջեյն Մահակյանը՝ նպատակ ունենալով բարձրացնել Հայաստանում Ալցհայմերի հիվանդության մասին հանրային  իրազեկման մակարդակն ու ստեղծել շարունակական ծրագրեր և ծառայություններ Ալցհայմերի հիվանդություն ունեցող անձանց, նրանց խնամատարների և ընտանիքների համար: Բժիշկ Ջեյնը Հայաստանում տարեցների խնամքի ծրագրերի և իրազեկման մակարդակի բարձրացմանն ուղղված  ծրագրերի առաջամարտիկներից է: Նրա հեղինակած՝ «Ես լսում եմ քեզ» գիրքը գործնական ուղեցույց է այն մարդկանց համար, ովքեր հոգ են տանում Ալցհայմերի հիվանդություն ունեցող իրենց հարազատի մասին և աջակցում է նպատակային կյանքին ու ապահովում է անկախությունը:

 

Էքսպեր Թեքնոլոջիս ընկերության մասին

 

Էքսպեր Թեքնոլոջիսն խնամքի ավտոմատացված օգնական Ռոբին ռոբոտին ստեղծած առողջապահական տեխնոլոգիական ընկերություն է և աջակցում է առաջնային առողջապահական օղակում աշխատող մասնագետներին բուժառուների իրական և վիրտուալ խնամքի գործում: Ընկերության նպատակն է փոխակերպել խնամքի արդյունաբերությունը՝ լրացնելով ԱՄՆ-ում 8 միլիոն խնամքի մատակարարների գնալով ավելացող պակասը և բարելավելով հիվանդների հասանելիությունը, արդյունքները և փորձը չորս անգամ ցածր գնով: Robin- ը հաջողությամբ իրականացվել է ավելի քան 10 մանկաբուժական հաստատություններում, ներառյալ գերժամանակակից UCLA Mattel հիվանդանոցը: Այժմ ընկերությունը փորձում է Ռոբինի օգտագործումը տարեցների խնամքի ոլորտում ՝ առաջին անգամ այն կիրառելով Նորքի տուն-ինտերնատում՝ հուզական աջակցություն, բժշկական մոնիտորինգ և վիրտուալ խնամք ապահովելու համար:

 

Հ. Հովնանյան ընտանիք հիմնադրամի մասին

 

Հ.Հովնանյան ընտանիքի հիմնադրամն աջակցում է Հայաստանում և հայկական համայնքներում իրականացվող և շահույթ չհետապնդող երկարաժամկետ ծրագրերին և հաստատություններին՝ ձգտելով մնայուն արժեք, կայուն ազդեցություն ու պատմություն թողնել իր գործունեության շնորհիվ: Հիմնադրամը սեփական նախաձեռնում և ծրագրեր է իրականացնում այն բնագավառներում, որտեղ որոշակի  բացթողումներ կան: Դրամաշնորհների, կրթաթոշակների և ծրագրերի ֆինանսավորման ու ներդրումների միջոցով հիմնադրամի հիմնական ուշադրության կենտրոնում են կրթության, առողջապահության, մշակույթի, կամավորության, էկոտուրիզմի ոլորտները, ինչպես նաև երիտասարդության զարգացումը, ձեռներեցությունը և արևմտյան արժեքների խթանումը:

 

 

Ծերաբույժ Ջեյն Մահակյան

 

«Ալցհայմերի խնամք Հայաստան»

կազմակերպության հիմնադիր և նախագահ

 

 

Նոյյան տապան  -   Մամլո հաղորդագրություն