Վրացական կողմի հետ քննարկվել է արագընթաց գնացքի գործարկման հնարավորության մասին, որը թույլ կտա Երևանից Թբիլիսի հասնել 2-3 ժամվա ընթացքում

Վրացական կողմի հետ քննարկվել է արագընթաց գնացքի գործարկման հնարավորության մասին, որը թույլ կտա Երևանից Թբիլիսի հասնել 2-3 ժամվա ընթացքում

  • 30-07-2021 20:09:51   | Հայաստան  |  Մամլո հաղորդագրություն

Վրաստան կատարած այցի շրջանակում նախարարի պաշտոնակատար Վահան Քերոբյանի գլխավորած պատվիրակությունը հուլիսի 29-ին հանդիպում է ունեցել Վրաստանի էկոնոմիկայի և կայուն զարգացման նախարար Նաթելա Տուրնավայի հետ։ Այս մասին տեղեկանում ենք ՀՀ էկոնոմիկայի նախարարությունից:
 
«Մեր երկրներն առանձին համեմատաբար փոքր շուկաներ ունեն, բայց միասին շատ ավելի գրավիչ կարող են դառնալ տարածաշրջանում։ Այս համատեքստում քննարկել ենք մի շարք համատեղ նախագծեր ենթակառուցվածքների, զբոսաշրջության, երկաթուղու և էներգետիկայի ոլորտներում», - նշել է Վահան Քերոբյանը։
 
Կողմերը խոսել են արագընթաց գնացքի գործարկման հնարավորության մասին, որը թույլ կտա Երևանից Թբիլիսի հասնել 2-3 ժամվա ընթացքում. արդյունքում կզարգանա զբոսաշրջությունը։ 
 
Գործընկերներն անդրադարձել են նաև երկու երկրների միջև գինեգործական տուրիզմի զարգացման հեռանկարներին։ 
 
????Աշխատանքային այցի շրջանակում հուլիսի 30-ին հայկական պատվիրակությունը հանդիպումներ է ունեցել նաև փոխվարչապետ-բնապահպանության և գյուղատնտեսության նախարար Լևան Դավիթաշվիլիի և Տարածաշրջանային զարգացման և ենթակառուցվածքների նախարար Իրակլի Քարսելաձեի հետ։ 
 
Վրացի գործընկերների հետ քննարկվել են տարածաշրջանային համագործակցության, Վրաստանի տարածքով տարանցիկ փոխադրումների հետ կապված խնդիրներ, ինչպես նաև անդրադարձ է եղել գյուղատնտեսության բնագավառում համագործակցության հնարավորություններին։
 
 
Նոյյան տապան   -   Մամլո հաղորդագրություն