Հայ-թուրքական հարաբերությունների կարգավորման առումով գնդակը շարունակում է մնալ Թուրքիայի դաշտում, և Թուրքիան է, որ պետք է քայլեր ձեռնարկի այդ ուղղությամբ: «Արմենպրես»-ի հետ զրույցում նման կարծիք հայտնեց «Ակօս» շաբաթաթերթի հայերեն բաժնի խմբագիր և հեղինակ Բագրատ Էստուկյանը՝ անդրադառնալով վերջին շաբաթներին Երևանի և Անկարայի միջև,այսպես ասած, «դրական ազդակների» փոխանակմանը:

 

Պոլսահայ լրագրողը շեշտեց, որ իր համոզմամբ՝ Հայաստանը այս պահին Թուրքիայի հետ բանակցելու և մանավանդ սակարկության սեղան նստելու կարիք չունի, քանի որ Թուրքիան է հրաժարվել Հայաստանի հետ դիվանագիտական հարաբերությունների հաստատումից և Թուրքիան է միակողմանիորեն փակել սահմանը: Հետևաբար, ինքն էլ պետք է առաջընթաց արձանագրի այս հարցում՝ առանց հայկական կողմից որևէ բան ակնկալելու:

 

«Այս օրերին Էրդողանը խոսում է հնգակողմ համաձայնության մասին՝ նկատի ունենալով Հայաստանը, Ադրբեջանը, Ռուսաստանը, Թուրքիան և Իրանը, և չի բացառում, որ 6-րդ գործոնն էլ կարող է լինել Վրաստանը: Մինչդեռ մեր խնդիրը երկկողմանի է: Այդ խնդիրը հետևյալն է. Հայաստանի անկախացումից անմիջապես հետո Թուրքիան, պաշտոնապես ճանաչելով Հայաստանի Հանրապետությունը, հրաժարվել է դիվանագիտական հարաբերություններ հաստատել: Ուրեմն, այս առումով գնդակը իր կիսաադաշտում է, ինքը պետք է այդ ուղղությամբ քայլ ձեռնարկի: Նույն հաջողությամբ, Արցախյան պատերազմը պատճառաբանելով՝ Թուրքիան փակել է Հայաստան-Թուրքիա ցամաքային սահմանը: Այդ մասին էլ պետք է, որ ինքը առաջընթաց արձանագրի՝ առանց մեզնից որևէ բան ակնկալելու, որովհետև այդ սահմանները բանակցություններով չէ, որ փակվել են, պարզապես Թուրքիայի միակողմանի որոշումով են փակվել: Այսօր, եթե պիտի վերաբացվեն, դարձյալ իր միակողմանի որոշումն է: Մեզ հետ բանակցելու նյութ չկա: Հետևաբար, մենք Թուրքիայի հետ բանակցելու և մանավանդ սակարկության սեղան նստելու կարիք բնավ չունենք», -  ասաց Բագրատ Էստուկյանը:

 

Պոլսահայ մեկնաբանի խոսքով՝ Էրդողանի ասածը հայ-թուրքական հարաբերությունների վերաբերյալ Հայաստանում շատ ավելի լայն արձագանք ստացավ, քան Թուրքիայում: Ընդ որում, զրուցակիցը շեշտեց, որ Թուրքիայի նախագահի այդ խոսքերը, թե Անկարան պատրաստ է աշխատել Հայաստանի հետ հարաբերությունները աստիճանաբար կարգավորելու ուղղությամբ, ոչ թե պատրաստված, ծրագրված հայտարարություն էր, այլ պարզապես լրագրողի հարցին հանպատրաստից տված պատասխան:

 

«Նախագահ Էրդողանի ասածները ծրագրի մասին չէին: Ավելի շատ նա տրամադրություն հայտնեց և այդ տրամադրությունը նախապես էր հայտնել 44-օրյա պատերազմի ավարտին՝ ասելով, որ հետզհետե կարգավորվեն այդ հարաբերությունները Կովկասում և, անշուշտ, Հայաստան-Թուրքիա հարաբերություններն էլ՝ նույնպես: Եվ սակայն որևէ հստակ քայլ արտաքին  նախարարության սահմանմամբ մինչև այսօր չենք նկատել: Հետևաբար, մենք շատ լուրջ չենք ընդունել այդ հայտարարությունը: Դա ինչ-որ զարգացման բացահայտում չէր, այլ պարզապես տրամադրության բացահայտում», - մեկնաբանեց «Ակօս»-ի խմբագիրը:

 

Ըստ ՀՀ կառավարության 2021-2026 թթ. ծրագրի՝ Հայաստանը պատրաստ է Թուրքիայի հետ հարաբերությունների կարգավորմանը առանց նախապայմանների: Հնգամյա ծրագրում նշվում է, որ Հայաստան-Թուրքիա դիվանագիտական հարաբերությունների բացակայությունը, փակ սահմանները, ինչպես և Թուրքիայի բացահայտ ներգրավվածությունը 2020 թ. 44-օրյա պատերազմում բացասական ազդեցություն են ունենում տարածաշրջանի խաղաղության և կայուն զարգացման վրա։

 

 

Նոյյան տապան  -   Ի՞նչ է գրում մամուլը