Բարհամ Սալեհը կարևորել է Իրաքում Հայաստանի դիվանագիտական ներկայության ընդլայնումը
07-09-2021 13:01:30 | Հայաստան | Ի՞նչ է գրում մամուլը
Հայկական ժամանակ. Դիվանագիտական առաքելության ավարտի կապակցությամբ սեպտեմբերի 6-ին Իրաքում ՀՀ դեսպան Հրաչյա Փոլադյանը հանդիպել է Իրաքի Հանրապետության նախագահ Բարհամ Սալեհին։ Այս մասին նշված է Իրաքում ՀՀ դեսպանատան պաշտոնական կայքում:
Երկկողմ հարաբերությունների զարգացման շրջանակներում կատարված արդյունավետ աշխատանքի համար նախագահ Բարհեմ Սալեհը շնորհակալություն է հայտնել Հրաչյա Փոլադյանին:
«Նախագահը կարևորել է Իրաքում Հայաստանի դիվանագիտական ներկայության ընդլայնումը, տնտեսական, մշակութային ծրագրերի և նախաձեռնությունների ակտիվացումը, ինչպես նաև ընդգծել է վերջին տարիներին կատարված արդյունավետ աշխատանքը։ Դիվանագետի միջոցով նա իր ջերմագին ողջույններն ու բարեմաղթանքներն է փոխանցել Հայաստանի բարձրագույն ղեկավարությանը»,- նշված է պաշտոնական հաղորդագրության մեջ:
Դեսպան Հր․ Փոլադյանը ջերմ ընդունելության և գնահատանքի խոսքերի համար շնորհակալություն է հայտնել նախագահին: Նա գոհունակությամբ նշել է, որ իր պաշտոնավարման ընթացքում իրաքյան իշխանություններն ու անձամբ նախագահը գործուն աջակցություն են ցուցաբերել Իրաքում ՀՀ դեսպանության ամենատարբեր ծրագրերի և նախաձեռնությունների իրականացման գործում։
ՀԱՅԵՐԵՆ
Русский
English
Դաս. հայերեն
French
