Դրմբոնում վերաբնակիչների համար տներ են վերանորոգվում
08-09-2021 18:17:04 | Արցախ (ԼՂՀ) | Ի՞նչ է գրում մամուլը
ԱՀ Մարտակերտի շրջանի Դրմբոն համայնքն ունի 370 բնակիչ. պատերազմի ավարտից հետո գյուղից հեռացողներ չեն եղել:
Այս մասին «Արցախպրես»-ի թղթակցի հետ զրույցում ասել է Դրմբոնի համայնքապետ Աշոտ Հակոբյանը:
«Համայնքում վերաբնակեցրել ենք հինգ ընտանիքի՝ 18 հոգով: Այս պահի դրությամբ 3 տուն վերանորոգվում է՝ տեղահանված այլ ընտանիքների տրամադրելու համար: Դպրոցն ունի 83 աշակերտ։ Մանկապարտեզ չի գործում, այս պահի դրությամբ շենքը վերակառուցվում է: Գյուղում գործում են համայնքային կենտրոն, բուժկետ, որոնց շենքային պայմանները լավ են. ունենք նաև հանդիսությունների սրահ: Գյուղն ապահովված է էլեկտրաէներգիայով, գազաֆիկացված է»,- նշեց Ա. Հակոբյանը:
Նա ցավով տեղեկացրեց, որ Արցախյան 44-օրյա պատերազմի ընթացքում մեկ համագյուղացի է զոհվել, չորսն էլ վիրավորվել են։
Խոսելով բնակիչների զբաղվածության մասին՝ մեր զրուցակիցը ասել է, որ բնակչության մեծ մասն աշխատում է «Բեյս մեթալս» ընկերությունում, գյուղացիները զբաղվում են նաև անասնապահությամբ, հողագործությամբ ու բանջարաբոստանային կուլտուրաների մշակությամբ: