personanews.am. Ադրբեջանում Արցախի հակամարտության հարցով փորձագետ Զարդուշտ Ալիզադեն այդ երկրի իշխանություններին կոչ է արել հաշտության գալ Հայաստանի հետ՝ Արցախի Հանրապետության տարածքում տեղակայված ռուսական խաղաղապահ ուժերից ազատվելու համար։ Այս մասին տեղեկացնում են ադրբեջանական լրատվամիջոցները։

 

Նա ընդգծել է, որ Արցախի տարածքից ռուս խաղաղապահներին վերացնելու համար Ադրբեջանը պետք է հաշտություն կնքի Հայաստանի հետ։

 

«Եթե ադրբեջանցի և հայ ժողովուրդները հաշտվեն,Ղարաբաղի հայ բնակչության համար սպառնալիքը կվերանա, և ռուս խաղաղապահներն այլևս ստիպված չեն լինի այնտեղ մնալ: Այսպիսով, ռուսները կլքեն Ղարաբաղը»,-ասել է նա:

 

Ալիզադեն ընդգծել է, որ եթե երկու ժողովուրդների միջև պատերազմական գործողությունները շարունակվեն, ապա անվստահությունը կմեծանա, երկու երկրների լրատվամիջոցները կշարունակեն միմյանց հայհոյել և վիրավորել, որի հետևանքով ռուսները կմնան Լեռնային Ղարաբաղում և հակամարտությունը չի լուծվի: Նրա խոսքով արտաքին ուժերը գալիս են տարածաշրջան, երբ որևէ կողմի անվտանգությունն ապահովելու անհրաժեշտություն կա, իսկ եթե անվտանգությանն ուղղված սպառնալիքներ չկան, եթե կողմերը հաշտվեն և գործեն միջազգային իրավունքներն ու ներքին օրենքները, ապա ռուս խաղաղապահների կարիքը այլևս չի լինի: «Եթե ​​նրանք ցանկանում են մնալ, ապա նրանք թշնամանք են քարոզելու, և միանգամայն բնական է, որ այդ թշնամանքը կմնա: Այս դեպքում ռուսները միշտ կլինեն տարածաշրջանում: Ռուսները չեն ցանկանում, որ ժողովուրդների միջև այս թշնամանքը վերանա: Նրանք արգելում են երկու երկրների պաշտոնյաներին հաշտվել»,-նշել է փորձագետը:

 

Ալիզադեն ուշադրություն է հրավիրել այն բանին, որ պատերազմը ավարտվել է գրեթե մեկ տարի առաջ, սակայն խաղաղ բանակցություններ դեռևս չեն ընթանում, իսկ կողմերի միջև պաշտոնական հանդիպումներին մշտապես ներկա են Ռուսաստանի Դաշնության ներկայացուցիչները:

 

«Լավրովն իրեն ցույց է տալիս յուրաքանչյուր հանդիպման ժամանակ: Թող Ջեյհուն Բայրամովը հանդիպի Արարատ Միրզոյանի, Զաքիր Հասանովը՝ Արշակ Կարապետյանի, Իլհամ Ալիևը՝ Նիկոլ Փաշինյանի հետ և զրուցեն: Կարծում եմ, որ այս դեպքում շատ հարցեր իրենց լուծումը կգտնեն: Բայց, ցավոք, ռուսները մեզանից հետ չեն մնում: Եվ որպեսզի դա տեղի ունենա, մենք պետք է հաշտվենք։ Ամբողջ Եվրոպան հարյուրավոր, հազարավոր տարիներ իրար սպանում են: Հիմա նրանք հաշտվել են ու ապրում են մարդկանց պես: Ինչո՞ւ մենք դա էլ չենք անում: Եթե ​​մենք ցանկանում ենք ազատվել Ռուսաստանի դիկտատուրայից, միակ ճանապարհը Հայաստանի հետ հաշտությունն է», - եզրափակել է քաղաքագետը։

 

 

Նոյյան տապան  -   Ի՞նչ է գրում մամուլը