Նախքան Տիգրան Մեծին հասնելը՝ կա Առաջին Հանրապետություն, Ազգերի լիգայի որոշումը
18-09-2021 11:53:04 | Հայաստան | Ի՞նչ է գրում մամուլը
lragir.am. Հայաստանի փոխվարչապետ Մհեր Գրիգորյանը հիշեցրել է, որ եռակողմ խմբի վերջին հանդիպումը տեղի է ունեցել մոտ մեկ ամիս առաջ: «Տարածաշրջանային կոմունիկացիաների ապաշրջափակումը նշանակում է, որ այն պետք է տեղի ունենա բոլոր հնարավոր ուղղություններով: Ամեն ինչ պետք է տեղի ունենա սահմանային և մաքսային ռեժիմների պահպանմամբ՝ օրենսդրական դաշտի հիման վրա», նշել է Մհեր Գրիգորյանը:
Հայաստանի դեմ կիրառվում են ճնշումներ`Հայաստանի իրավասությունից դուրս «միջանցքներ» բացելու համար: Այս հանգամանքը բավական թափանցիկ հաստատեց ՌԴ ԱԳՆ ներկայացուցիչն իր վերջին բրիֆինգում։ ՀՀ կառավարությունը պնդում է, որ Հայաստանի տարածքով անցնող ցանկացած ճանապարհ ենթադրում է մաքսային և սահմանային ընթացակարգեր`ՀՀ իրավասության ներքո:
Փոխվարչապետը, մեկնաբանելով ՌԴ ԱԳՆ ներկայացուցիչ Մարիա Զախարովայի հայտարարությունն այն մասին, որ Ռուսաստանը կողմերին փոխանցել է սահմանազատման և սահմանագծման վերաբերյալ առաջարկություններ, ասել է, որ այս ուղղությամբ պետք է սկսել որոշ գործընթացներ: Իշխող ուժն ընտրել է «խորհրդային տարբերակը»:
Անվտանգության և պաշտպանության հարցերով հանձնաժողովի նախագահ Անդրանիկ Քոչարյանը հաստատել է, որ սահմանազատման վերաբերյալ «երկխոսությունը» պետք է սկսի խորհրդային քարտեզներից:
«Իսկ ի՞նչ քարտեզ պետք է օգտագործել որպես ուղեցույց․ Տիգրան Մեծի ժամանակների՞: … Իհարկե, մենք պետք է պաշտպանենք մեր շահերը, Ադրբեջանը առաջ կմղի իր նպատակները: Բայց սա տարիների, տասնամյակների գործընթաց է: Պետք է լինի ինչ -որ սահման, որի շուրջ մենք պետք է սկսենք երկխոսություն և պաշտպանենք մեր իրավունքները», ասել է նա:
Գուցե հիմա հնարավոր չէ հասնել Տիգրան Մեծի ժամանակներ, բայց կարելի է գոնե հասնել Ազգերի լիգայի կողմից ճանաչված Առաջին Հանրապետության սահմաններին: Բայց ներկայիս իշխողների պաթոլոգիական թշնամանքը դաշնակների, Առաջին հանրապետության, Արցախի 1994-ի սահմանների նկատմամբ եթե հավաքագրում էլ չէ, նրանց հակում է խորհրդային-ռուսականին։
ՀԱՅԵՐԵՆ
Русский
English
Դաս. հայերեն
French
