Խնդրում եմ զերծ մնալ որևիցե մեկնաբանությունից. Դավիթ Գևորգյանն անդրադարձել է պաշտոնից ազատման իր դիմումին
27-10-2021 19:11:48 | Արագածոտնի մարզ | Քաղաքական
Արագածոտնի մարզպետ Դավիթ Գևորգյանը ֆեյսբուքյան իր էջում անդրադարձել է պաշտոնից ազատման իր դիմումին.
«Սիրելի՛ հայրենակիցներ, Արագածոտնի մարզի թանկագի՛ն բնակիչներ,
Այսօր Հայաստանի Հանրապետության վարչապետ Նիկոլ Փաշինյանին եմ ներկայացրել Արագածոտնի մարզպետի պաշտոնից հրաժարականի դիմում:
Իմ հանդեպ ունեցած բարձր վստահության համար շնորհակալ եմ ՀՀ վարչապետ Նիկոլ Փաշինյանին, իմ բոլոր գործընկերներին և ժողովրդին:
Համատեղ հետաքրքրիր ու արգասաբեր աշխատանքի համար շնորհակալ եմ Արագածոտնի մարզպետարանի աշխատակիցներին, մարզի համայնքների ղեկավարներին, պետական և մասնավոր բոլոր կառույցների աշխատակիցներին, մարզի բնակիչներին, ովքեր Արագածոտնի մարզի շենացման ճանապարհին եղել են մեր կողքին:
Գնահատում եմ մարզի բարօրության համար ձեր ջանքերն ու նվիրված աշխատանքը, որը վստահ եմ շարունակական է լինելու:
Հաջողությունները մեր բոլորինն են, բացթողումներն ու թերացումները՝ միայն իմը:
Վստահ եմ, որ մենք միասին ստեղծելու ու ապրելու ենք մեր բոլորի երազած՝ տնտեսապես զարգացած, հզոր ու երջանիկ Հայաստանում:
Աստված պահապան մեր հայրենիքին ու մեր ժողովրդին:
Հ.Գ. Խնդրում եմ զերծ մնալ որևիցե մեկնաբանությունից, քանի որ արդեն տեղյակ եմ, որ մամուլում և տարբեր շրջանակներում կեղծ, իրականությանը չհամապատասխանող ենթադրություններ են տարածվում»:
ՀԱՅԵՐԵՆ
Русский
English
Դաս. հայերեն
French
