Ադրբեջանը և Հայաստանը՝ ՆԱՏՕ-ի համար «արժեքավոր գործընկերներ»
18-01-2022 14:00:31 | Հայաստան | Ի՞նչ է գրում մամուլը
Ազատություն. Trend ադրբեջանական լրատվական գործակալության փոխանցմամբ, Կովկասում և Կենտրոնական Ասիայում ՆԱՏՕ-ի հատուկ ներկայացուցիչ Խավիեր Կոլոմինան հույս է հայտնել, որ դաշինքը կշարունակի բարձր մակարդակով երկխոսությունը և լայնածավալ համագործակցությունն Ադրբեջանի հետ:
Ըստ Trend-ի, տարածաշրջան վերջին այցի ընթացքում Կոլոմինան հանդիպել է Ադրբեջանի մի շարք բարձրաստիճան ղեկավարների հետ և քննարկել ՆԱՏՕ-Ադրբեջան համագործակցության հարցերը, այդ թվում՝ «Ծրագրավորման գործընթաց և վերլուծություն» ծրագրի շրջանակում ադրբեջանական իշխանությունների հետ համագործակցությունը վերականգնելու հնարավորությունը:
ՆԱՏՕ-ն նաև հույս է հայտնել, որ Ադրբեջանը և Հայաստանը կբարելավեն հարաբերությունները:
«Ադրբեջանը և Հայաստանը ՆԱՏՕ-ի համար արժեքավոր գործընկերներ են, մենք կոչ ենք անում կողմերին խուսափել այնպիսի գործողություններից, որոնք կարող են հանգեցնել բռնությունների վերսկսման, չլուծված հարցերը պետք է կարգավորել դիվանագիտական ճանապարհով: Ողջունում ենք երկխոսությունը թե՛ Մինսկի խմբի շրջանակում և թե՛ դրանից դուրս, ակնկալում ենք տեսնել երկու երկրների միջև հարաբերությունների բնականոնացմանն ուղղված քայլեր», - Trend-ին փոխանցել են Հյուսիսատլանտյան դաշինքից:
ՆԱՏՕ-ի հատուկ ներկայացուցիչը տարածաշրջանում էր անցած տարվա հոկտեմբերին, Հայաստանում նա հանդիպել է վարչապետի, պաշտպանության և արտաքին գործերի նախարարների հետ։
ՀԱՅԵՐԵՆ
Русский
English
Դաս. հայերեն
French
