Հայ-ադրբեջանական «դրական ազդակները». Ճանապարհների ապաշրջափակումը սկսվա՞ծ է
28-01-2022 16:03:27 | Հայաստան | Մեկնաբանություն
Հայաստանի վարչապետ Նիկոլ Փաշինյանի վերջին ասուլիսից հետո Ադրբեջանի նախագահը Իլհամ Ալիևը հայտարարել է ստեղծված «նոր հիանալի հնարավորությունների» մասին: Նա ասել է, թե Հայաստանից դրական ազդակներ է ստանում «Զանգեզուրի միջանցքի» մասին, և նույնիսկ Իրանին հրավիրել մասնակցելու ապագա նախագծին։ «Բարեհաջող կերպով ընթանում է ինչպես ավտոճանապարհային, այնպես էլ երկաթուղային ճանապարհների շինարարությունը: Հայաստանից նույնպես դրական լուրեր են գալիս: Հայաստանը նույնպես նախատեսում է մեկնարկել այդ աշխատանքներն իր տարածքում»,- ասել է Ալիևը:
Նշենք, որ հունվարի 24-ին` ասուլիսի ժամանակ, Նիկոլ Փաշինյանը հիշեցրել էր, որ բրյուսելյան հանդիպումից հետո Ադրբեջանի նախագահի հետ համաձայնության են եկել, որ պետք է սկսեն Երասխ-Օրդուբադ-Մեղրի-Հորադիզ երկաթուղու կառուցումը: Հայաստանի վարչապետն ընդգծել է, որ այդ ծրագիրը տասնյակ անգամ ավելի էժան է. նախնական գնահատականով` 200 մլն դոլար և 5 մլն դոլար ներդրման մասին է, ինչը Հայաստանի համար շատ ծանր բեռ չէ: Նա նաև ասել է, որ շատ միջազգային դոնորներ մեծ հետաքրքրություն են ցուցաբերում, և շատ հնարավոր է, որ լինեն այնպիսի կոմբինացիաներ, որ նույնիսկ Հայաստանի պետական բյուջեից փող ներդնելու անհրաժեշտություն չլինի:
ՀԱՅԵՐԵՆ
Русский
English
Դաս. հայերեն
French
