Մինչ այս պահը հաստատված 39 գերի կա Ադրբեջանում. Փաշինյան
25-05-2022 17:06:15 | Հայաստան | Քաղաքական
Բրյուսելում հիմնական քննարկվող թեմաներից մեկը նաև գերիների վերադարձն է եղել: Այս մասին Ազգային ժողովում կառավարության հետ հարցուպատասխանի ժամանակ հայտարարեց վարչապետ Նիկոլ Փաշինյանը։ Նա մանրամասնեց, որ Եվրամիության, միջազգային կազմակերպությունների և Հայաստանի դիրքորոշումն այն է, որ օր առաջ գերեվարվածները պետք է վերադարձվեն։
Փաշինյանի խոսքով՝ Ադրբեջանն աընդհատ փորձում է լրացուցիչ պայմանների հետ կապել գերիների, պատանդների և այլ պահվող անձանց վերադարձը։ «Մենք համաձայն չենք այդ դիրքորոշման հետ, մեր դիրքորոշումը շարունակում է մնալ այն, որ նոյեմբերի 9-ի եռակողմ հայտարարության համաձայն, բոլոր պահվող անձինք՝ ռազմագերիները, պատանդները պետք է վերադարձվեն», - ասաց ՀՀ վարչապետը:
Նա հայտնեց, որ մինչ այս պահը հաստատված 39 գերի կա Ադրբեջանում, որոնցից մեկը վերջերս է մոլորվելով հայտնվել ադրբեջանցիների վերահսկողության ներքո։ «Մենք բոլոր հնարավոր ջանքերը գործադրում ենք, ի դեպ, ամենաարդյունավետ ձևը միջազգային հանրության աջակցությունը և ճնշումն ապահովելն է, որպեսզի մեր քաղաքացիներն օր առաջ վերադառնան հայրենիք», - ասաց Փաշինյանը։
ՀԱՅԵՐԵՆ
Русский
English
Դաս. հայերեն
French
